ആറു വർഷം രാജ്യസഭാംഗം
ആറു വർഷമാണ് ലത മങ്കേഷ്‌കർ രാജ്യസഭ എം.പിയായി സേവനമനുഷ്ഠിച്ചത്. യാതൊരു അലവൻസും കൈപ്പറ്റാത്ത എം.പി എന്ന നിലയിലാണ് അവർ ശ്രദ്ധേയയായത്. 1999 നവംബർ 22ന് രാജ്യസഭാംഗമായ അവർ 2005 നവംബർ 21 വരെ ആ സ്ഥാനത്ത് തുടർന്നു.
പാർലമെന്റ് അംഗമെന്ന നിലയിൽ അവർ നയാപൈസ കൈപ്പറ്റിയിരുന്നില്ലെന്ന് വിവരാവകാശ രേഖയിൽ പറയുന്നു. അവർക്കയച്ച പ്രതിഫലമത്രയും കൈപ്പറ്റാതെ തിരിച്ചുവരികയായിരുന്നു.
സഭയിൽ കുറഞ്ഞ ദിവസങ്ങളിലേ അവർ ഹാജരായിരുന്നുള്ളൂ. ആറു വർഷത്തിനിടെ ലത സഭയിൽ ഹാജരായത് 12 ദിവസം മാത്രമായിരുന്നു. ഈ ദിവസങ്ങളിൽ തന്നെ മുഴുസമയവും അവർ സഭയിലിരുന്നില്ല.
ഒരുപക്ഷേ ഇതിനാലാകാം അവർ രാജ്യസഭാംഗമെന്ന നിലയിലുള്ള പ്രതിഫലം സ്വീകരിക്കാതിരുന്നത്. ഈ കാലയളവിൽ ഒരേയൊരു ചോദ്യമാണ് അവർ ഉന്നയിച്ചത്. അത് ട്രെയിനുകൾ പാളംതെറ്റുന്നതിനെ കുറിച്ചായിരുന്നു.
താൻ പാർലമെന്റ് അംഗമാകാൻ യോജിച്ചവളല്ലെന്ന് ലതയ്ക്ക് ബോധ്യപ്പെട്ടിരുന്നു. തനിക്ക് രാഷ്ട്രീയത്തെ കുറിച്ച് ഒന്നുമറിയില്ലെന്നും ഒരു അഭിമുഖത്തിൽ അവർ പറഞ്ഞു. അതിനിടെ, താൻ പ്രതിനിധീകരിക്കുന്ന ഫിലിം വ്യവസായത്തിന്റെ പ്രശ്‌നങ്ങൾ എന്തുകൊണ്ട് പാർലമെന്റിൽ ഉന്നയിക്കുന്നില്ല എന്ന വിമർശനവും അവർ നേരിട്ടു.
താൻ വിനോദവ്യവസായത്തിന്റെ ഭാഗമല്ലെന്നും ഗായികയാണ്, പ്രസംഗകയല്ല എന്നിങ്ങനെയായിരുന്നു അവരുടെ മറുപടി. ബി.ജെ.പി പിന്തുണയോടെയാണ് ലത രാജ്യസഭാ എം.പിയായത്.