മാനന്തവാടി: വൈദ്യുതി ലൈനില്‍ നിന്നു ഷോക്കേറ്റ് കാട്ടാന ചെരിഞ്ഞു. നോര്‍ത്ത് വയനാട് വനം ഡിവിഷന് കീഴിലെ ബേഗൂര്‍ റെയ്ഞ്ചില്‍പെട്ട അപ്പപ്പാറ പനവല്ലി കൂപ്പ് റോഡിലാണ് 12 വയസ് തോന്നിക്കുന്ന കൊമ്പന്‍ ചെരിഞ്ഞത്. തേക്ക് മരത്തില്‍ നിന്ന് ഇല പറിക്കാന്‍ ശ്രമിവേ മരം വൈദ്യുതിലൈനിലേക്കു ചാഞ്ഞാണ് ആനയ്ക്ക് ഷോക്കേറ്റതെന്നു വനംവകുപ്പ് ഉദ്യോഗസ്ഥര്‍ പറഞ്ഞു. ഇന്നലെ രാവിലെയാണ് ആനയെ ചെരിഞ്ഞ നിലയില്‍ കണ്ടത്. വിവരമറിഞ്ഞ് ബേഗൂര്‍ റെയ്ഞ്ച് ഓഫിസര്‍ നജ്മല്‍ അമീന്റെ നേതൃത്വത്തിലുള്ള വനപാലകര്‍ സ്ഥലത്തെത്തി. വെള്ളമുണ്ട വെറ്ററിനറി ഡോക്ടര്‍ ജിജിമോന്‍ ആനയുടെ ജഡം പോസ്റ്റ്‌മോര്‍ട്ടം നടത്തി.