ചെറുവത്തൂര്‍: പൊതുതെരഞ്ഞെടുപ്പ് മാതൃകയില്‍ നടന്ന വോട്ടെടുപ്പിലൂടെ മദ്‌റസ വിദ്യാര്‍ഥികള്‍ ജനാധിപത്യത്തിന്റെ ബാലപാഠങ്ങളറിഞ്ഞു. ചന്തേര ഹയാത്തുല്‍ ഇസ്‌ലാം മദ്‌റസയിലാണ് ബാലറ്റ് പേപ്പറില്‍ വോട്ട് രേഖപ്പെടുത്തി കുട്ടികള്‍ ലീഡറെ തെരഞ്ഞടുത്തത്.
എട്ടു സ്ഥാനാര്‍ഥികളാണ് മത്സര രംഗത്തുണ്ടായിരുന്നത്. ഒരാഴ്ചത്തെ പ്രചാരണത്തിനൊടുവില്‍ നടന്ന വോട്ടെടുപ്പില്‍ സി.എം മിസ്ഹബ് ഉമൈര്‍ ലീഡറായി തെരഞ്ഞെടുക്കപ്പെട്ടു. മദ്‌റസ പ്രധാനധ്യാപകന്‍ മുഹമ്മദ് ഷഫീഖ് ദാരിമിയായിരുന്നു റിട്ടേണിങ് ഓഫിസര്‍. ഒ.ടി അബ്ദുള്‍ റഊഫ് മൗലവി, മജീദ് മൌലവി, സുബൈര്‍ മൗലവി, ഹസൈനാര്‍ ഫൈസി എന്നിവര്‍ പോളിങ് ഓഫിസര്‍മാരായി നടപടി ക്രമങ്ങള്‍ നിയന്ത്രിച്ചു.
ചന്തേര മുസ്‌ലിം ജമാത്ത് കമ്മിറ്റി പ്രസിഡന്റ് ടി.കെ പൂക്കോയ തങ്ങള്‍ ഫലപ്രഖ്യാപനം നടത്തി. എ.പി.പി കുഞ്ഞഹമ്മദ്, എം.കെ ഇസ്മായില്‍ ഹാജി, ടി.കെ സത്താര്‍ ഹാജി, എം.ടി.പി സുലൈമാന്‍ ഹാജി, ടി.വി.പി അബ്ദുള്‍ ഖാദര്‍ സംബന്ധിച്ചു.