കോഴിക്കോട്: തവനൂര്‍ മണ്ഡലത്തില്‍ മത്സരിക്കാന്‍ പ്രതിപക്ഷ നേതാവ് രമേശ് ചെന്നിത്തലയെ വെല്ലുവിളിച്ച് മന്ത്രി കെ.ടി ജലീലും. നേരത്തെ, സ്പീക്കര്‍ പി. രാമകൃഷ്ണന്‍ ചെന്നിത്തലയെ പൊന്നാനിയില്‍ മത്സരിക്കാന്‍ വെല്ലുവിളിച്ചിരുന്നു.

ഐശ്വര്യ കേരള യാത്ര തവനൂര്‍ മണ്ഡലത്തിയപ്പോള്‍ രമേശ് ചെന്നിത്തല ഫെയ്‌സ്ബുക്കില്‍ പോസ്റ്റിട്ടതിന് മറുപടിയായാണ് ജലീലിന്റെ വെല്ലുവിളി. ആലത്തിയൂരിലെ സ്വീകരണം, തവനൂര്‍ ഒരു രാഷ്ട്രീയ മാറ്റത്തിന് ഒരുങ്ങി എന്ന സൂചന നല്‍കുന്നുവെന്നായിരുന്നു ചെന്നിത്തലയുടെ പോസ്റ്റ്. ഇതിന്റെ സ്‌ക്രീന്‍ഷോട്ട് പങ്കുവച്ചാണ് ജലീലിന്റെ മറുപടി.

കെ.ടി ജലീലിന്റെ ഫെയ്‌സ്ബുക്ക് പോസ്റ്റ്

സ്വന്തം മകന് IAS കിട്ടാന്‍ നടത്തിയ വഴിവിട്ട കളികള്‍, ഊക്കന്‍ തള്ള് തള്ളിയിട്ടും കിട്ടാതായപ്പോള്‍ IRS ല്‍ തൃപ്തിയടഞ്ഞ കഥ, മറ്റൊരു മകന് അമൃത മെഡിക്കല്‍ കോളേജില്‍ PG ക്ക് ഫീസ് കൊടുക്കാന്‍ ബാര്‍ മുതലാളിമാരില്‍ നിന്ന് ഒരു കോടി കൈക്കൂലി വാങ്ങിയ കേസില്‍ കുടുങ്ങിക്കിടക്കുന്ന അനുഭവം, കോണ്‍ഗ്രസ്സിലെ സംഘി ഗ്രൂപ്പിന്റെ തലൈവര്‍, അങ്ങിനെ ഒരുപാട് വിശേഷണങ്ങള്‍ക്കര്‍ഹനാണ് പ്രതിപക്ഷ നേതാവ് ശ്രീ രമേശ് ചെന്നിത്തല. തവനൂരില്‍ മാറ്റത്തിന്റെ കാറ്റ് വീശുന്നുണ്ടെങ്കില്‍ രമേശ്ജിക്കും ഒരു കൈ നോക്കാവുന്നതാണ്. എന്താ വരുന്നോ കേളപ്പജിയുടെ മണ്ണിലേക്ക്?