തിരുവനന്തപുരം: വയനാട്ടിലെ മെഡിക്കല്‍ കോളേജ് മാനന്തവാടിയില്‍ നിര്‍മിക്കാനാണ് മന്ത്രിസഭ തീരുമാനം. മാനന്തവാടിക്കടുത്ത് ബോയ്‌സ് ടൗണിലെ സര്‍ക്കാര്‍ ഭൂമിയില്‍ പുതിയ മെഡിക്കല്‍ കോളേജുണ്ടാക്കാനാണ് തീരുമാനം. അതിന്റെ പണി പൂര്‍ത്തിയാകും വരെ മാനന്തവാടിയിലെ ജില്ലാ ആശുപത്രി മെഡിക്കല്‍ കോളേജായി പ്രവര്‍ത്തിക്കും. വയനാട്ടിലെ മാനന്തവാടി ജില്ലാ ആശുപത്രിയെ മെഡിക്കല്‍ കോളേജാക്കി ഉയര്‍ത്തുവാനും തീരുമാനിച്ചതായി മുഖ്യമന്ത്രി അറിയിച്ചു. ഇതിനായി കൂടുതല്‍ തസ്തികകള്‍ സൃഷ്ടിക്കും. സൗകര്യങ്ങള്‍ മെച്ചപ്പെടുത്തുമെന്നും മുഖ്യമന്ത്രി വ്യക്തമാക്കി.

നേരത്തെ ജില്ലാ കലക്ടറുടെ നേതൃത്വത്തിലുള്ള സംഘം ബോയ്‌സ് ടൗണിലെത്തി പരിശോധന നടത്തിയിരുന്നു. പരിസ്ഥിതി പ്രശ്‌നമില്ലാത്തതിനാല്‍ ഇവിടെ മെഡിക്കല്‍ കോളേജ് സുമുച്ചയമുണ്ടാക്കാമെന്ന കലക്ടറുടെ റിപ്പോര്‍ട്ടാണ് നിലവിലെ തീരുമാനങ്ങള്‍ക്കാധാരം. നേരത്തെ കണ്ടെത്തിയ മടക്കി മലയിലെയും ചുണ്ടേലെയും ഭൂമി അനുയോജ്യമെല്ലെന്ന് വിദഗ്ധസമിതി സര്‍ക്കാരിന് റിപ്പോര്‍ട്ട് നല്‍കിയിരുന്നു.

പതിറ്റാണ്ടുകളായുള്ള വയനാടിന്റെ കാത്തിരിപ്പിന് ഇതോടെ വിരാമമാകുകയാണ്. അതേ സമയം എത്രകാലം കാത്തിരിക്കേണ്ടിവരും ഈ സൗകര്യങ്ങള്‍ വയനാട്ടുകാര്‍ക്ക് ലഭിച്ചുതുടങ്ങാന്‍ എന്നത് കാത്തിരുന്നു കാണേണ്ടാണ്.