റിയാദ്: സഊദിയിൽ ബഖാലകൾക്ക് നിർബന്ധമാക്കിയ പുതിയ മാർഗ്ഗ നിർദേശങ്ങളുടെ ഒന്നാം ഘട്ടം ഇന്നലെ മുതൽ പ്രാബല്യത്തിലായി. സഊദി നഗര ഗ്രാമകാര്യ മന്ത്രാലയമാണ് പുതിയ മാനദണ്ഡങ്ങൾ പുറത്തിറക്കിയത്. മുഴുവൻ ബഖാലകളിലും സിസിടിവി കാമറകൾ സ്ഥാപിക്കുക, എല്ലാ ഉത്പന്നങ്ങൾക്ക് മുകളിലും വില പ്രദർശിപ്പിക്കുക, തൊഴിലാളികളുടെ ഹെൽത്ത് സർട്ടിഫിക്കറ്റ്, ലൈസൻസ് ഉണ്ടായിരിക്കുക എന്നതടക്കമുള്ള മാർഗ്ഗ നിർദേശങ്ങളാണ് പ്രാബല്യത്തിലായത്.

     ഇലക്ട്രോണിക് ബില്ലുകൾ നൽകുന്നതിനുള്ള സംവിധാനം, പുതിയ ബോഡുകളുടെ നിബന്ധനകൾ പാലിക്കൽ, സ്ഥാപനത്തിലേക്ക് സുതാര്യമായ കാഴ്‌ച ഒരുക്കുക, പുറത്തേക്ക് വലിക്കുന്ന ഗ്ലാസ് ഡോർ സ്ഥാപിക്കുക, ലൈറ്റുകൾ ഉറപ്പ് വരുത്തുക, തീയണക്കാനുള്ള സിലിണ്ടറുകൾ സ്ഥാപിക്കുക, പ്രതലങ്ങളും ഫ്രീസറും ഗ്ളാസും എല്ലാം വൃത്തിയായി സൂക്ഷിക്കുക, ക്ളീനിംഗ് വസ്‌തുക്കളും മറ്റും ഭക്ഷണ സാധനങ്ങളിൽ നിന്ന് ദൂരെ മാറ്റി സ്ഥാപിക്കുക എന്നിവയാണ് രണ്ടാം ഘട്ട നിബന്ധനകളിൽ വരുന്നത്.

     കൂടാതെ, നിലവും മേൽക്കൂരയും ഭിത്തികളും റാക്കുകളും ഉൽപന്നങ്ങൾ സൂക്ഷിക്കുന്ന സ്ഥലങ്ങളും വൃത്തിയുള്ളതായിരിക്കൽ, റെഫ്രിജറേറ്ററുകളും ഫ്രീസറുകളും പരിസരപ്രദേശങ്ങളും വൃത്തിയുള്ളതായിരിക്കൽ, റാക്കുകൾക്കിടയിൽ മിനിമം അകലം പാലിക്കൽ, ശുചീകരണ വസ്തുക്കളും ഉപകരണങ്ങളും ഭക്ഷ്യവസ്തുക്കളിൽനിന്ന് ദൂരെ സൂക്ഷിക്കൽ, ഫസ്റ്റ് എയിഡ് ബോക്‌സ് എന്നിവ ഉൾപ്പെടെ ഏതാനും കാര്യങ്ങൾ കൂടി രണ്ടാം ഘട്ടത്തിൽ പാലിക്കണം.

   ഒന്നാം ഘട്ടം ഫെബ്രുവരിൽ 10 മുതലും രണ്ടം ഘട്ടം ജൂൺ 29 മുതലുമായിരിക്കും നടപ്പിലാക്കുകയെന്ന് നേരത്തെ തന്നെ അറിയിച്ചിരുന്നു.