മുംബൈ: പ്രശസ്ത സംഗീത സംവിധായകനും ഗായകനുമായ ബപ്പി ലാഹിരി അന്തരിച്ചു. 69 വയസായിരുന്നു. മുംബൈയിലെ ക്രിട്ടികെയര്‍ ആശുപത്രിയിലായിരുന്നു അന്ത്യം.

ഒരു മാസത്തെ ആശുപത്രി ചികിത്സയ്ക്ക് ശേഷം തിങ്കളാഴ്ച ഡിസ്ചാര്‍ജ് ചെയ്തതായിരുന്നു. എന്നാല്‍ വീട്ടിലെത്തിയതിന് ശേഷം ആരോഗ്യസ്ഥിതി വീണ്ടും മോശമായതോടെ തിരികെ ആശുപത്രിയിലെത്തിച്ചുവെങ്കിലും മരിച്ചു.

80-90 കാലഘട്ടത്തെ ഡിസ്‌കോ സംഗീതത്തിലൂടെ ജനപ്രിയത നേടിയ ബപ്പി ലാഹിരിയുടെ അവസാനത്തെ ബോളിവുഡ് പാട്ട് 2020 ല്‍ പുറത്തിറങ്ങിയ ബാഗി 3 എന്ന ചിത്രത്തിലായിരുന്നു. നിരവധി സിനിമകള്‍ക്കായി സംഗീതം നല്‍കിയിട്ടുണ്ട്. മലയാളത്തില്‍ ഗുഡ് ബോയ്‌സ് എന്ന ചിത്രത്തിനും സംഗീത സംവിധാനം നിര്‍വഹിച്ചിട്ടുണ്ട്. 2014 മുതല്‍ ബി.ജെ.പിയില്‍ ചേര്‍ന്ന് പ്രവര്‍ത്തിക്കുകയായിരുന്നു.