കണ്ണൂര്‍: കണ്ണൂര്‍ തോട്ടടയില്‍ വിവാഹ സംഘത്തിന് നേരെയുണ്ടായ ബോംബേറില്‍ യുവാവ് കൊല്ലപ്പെട്ട സംഭവത്തില്‍ ഒരാള്‍ കൂടി കസ്റ്റഡിയില്‍. കടമ്പൂര്‍ സ്വദേശി അരുണിനെയാണ് കസ്റ്റഡിയിലെടുത്തത്. ഇയാളുടെ അറസ്റ്റ് രേഖപ്പെടുത്തും. സ്‌ഫോടക വസ്തുക്കള്‍ വാങ്ങിയത് കണ്ണൂരില്‍ നിന്ന് തന്നെയാണെന്ന് പൊലിസ് പറഞ്ഞു. ഇവര്‍ക്ക് സ്‌ഫോടക വസ്തു നല്‍കിയ കടക്കാരനായി അന്വേഷണം ആരംഭിച്ചിട്ടുണ്ടെന്നും പൊലിസ് അറിയിച്ചു.

ഫെബ്രുവരി 13നാണ് തോട്ടടയിലെ വിവാഹ ആഘോഷത്തില്‍ രാത്രി നടന്ന സംഗീതപരിപാടിക്കിടെ വരന്റെ സുഹൃത്തുക്കളായ ഏച്ചൂര്‍ സ്വദേശികളും പ്രദേശവാസികളും തമ്മില്‍ വാക്കേറ്റവും സംഘര്‍ഷവുമുണ്ടായത്. ഇതിന് പ്രതികാരമായി പ്രത്യേക യൂണിഫോമിട്ട് വന്ന സംഘം വിവാഹസംഘത്തിന് നേരെ ബോംബെറിയുകയായിരുന്നു.

ബോംബെറിഞ്ഞ സംഘത്തിന്റെ പക്കല്‍ വാളുമുണ്ടായിരുന്നതായി പൊലിസ് കണ്ടെത്തിയിട്ടുണ്ട്. സംഘത്തിലുണ്ടായിരുന്ന സനാദിന് വാള്‍ നല്‍കിയത് അരുണാണെന്നാണ് പൊലിസ് പറയുന്നത്. സംഭവത്തില്‍ സംഘത്തിലുണ്ടായിരുന്ന ജിഷ്ണുവെന്ന യുവാവ് കൊല്ലപ്പെട്ടിരുന്നു. ഇവര്‍ രണ്ടാമതെറിഞ്ഞ ബോംബ് ജിഷ്ണുവിന്റെ തലയില്‍ വീണ് പൊട്ടുകയായിരുന്നു.