റിയാദ്: അനധികൃതമായ രീതിയിൽ ഭീമമായ തുക ശേഖരിച്ച് വിദേശങ്ങളിലേക്ക് കടത്തിയ സംഭവത്തിൽ പ്രതികൾക്ക് 64 വർഷം തടവ് ശിക്ഷ വിധിച്ചു. വിദേശികൾ ഉൾപ്പെടെയുള്ള സംഘം പണത്തോടൊപ്പം സ്വർണ്ണവും കടത്തിയ കേസിലാണ് വിധി. കൈക്കൂലി വാങ്ങിയും മറ്റും ശേഖരിച്ച വൻ തുകയുടെ കള്ളപ്പണം വെളുപ്പിക്കുന്നതിനുള്ള ശ്രമങ്ങൾ നടക്കുന്നുണ്ടെന്ന സൂചനയെ തുടർന്ന് നടത്തിയ അന്വേഷണത്തിലാണ് ഹവാല സംഘം പിടിയിലായതെന്ന് പബ്ലിക്ക് പ്രോസിക്യൂഷൻ അറിയിച്ചു.

    64,860,000 റിയാൽ പണവും 19 കിലോഗ്രാം സ്വർണവും ഇവർ വിദേശങ്ങളിലേക്ക് അയച്ചിട്ടുണ്ടെന്ന് തെളിഞ്ഞതായും പ്രോസിക്യൂഷൻ വ്യക്തമാക്കി. രാജ്യം വിടാനുള്ള തയാറെടുപ്പിലായിരുന്ന പ്രതികളിൽ ഒരാളെയാണ് ആദ്യം അറസ്റ്റ് ചെയ്തത്. 10,20,290 റിയാലും ഏതാനും വാഹനങ്ങളും ഇയാളുടെ പക്കൽനിന്ന് പിടിച്ചെടുത്തു. പ്രതികളിൽ സ്വദേശികൾക്ക് അവരുടെ ജയിൽവാസത്തിന് തുല്യമായ കാലയളവ് യാത്രാവിലക്കും വിദേശികളായ പ്രതികളെ ജയിൽശിക്ഷ അനുഭവിച്ചതിന് ശേഷം നാടുകടത്തുകയും ചെയ്യും. വിദേശങ്ങളിലേക്ക് കടത്തിയ തുക ഇവരിൽനിന്ന് വീണ്ടെടുക്കാനും വിധിച്ചിട്ടുണ്ട്.