കുറ്റിക്കാട്ടൂര്‍: ബസ്സും വാനും  കൂട്ടിയിടിച്ച് റോഡരികിലൂടെ നടന്നുപോവുകയായിരുന്ന വിദ്യാര്‍ഥിനികള്‍ക്ക് പരുക്കേറ്റു. കുറ്റിക്കാട്ടൂര്‍ അങ്ങാടിയിലായിരുന്നു അപകടം. കുറ്റിക്കാട്ടൂര്‍ പയിങ്ങോട്ട് പുറംകുണ്ടട മീത്തല്‍ ഹനീഫ-സൗദാബി  ദമ്പതികളുടെ ഏഴാംതരം വിദ്യാര്‍ഥിനി ഹന്ന തസ്‌നി (11), അതേ സ്‌കൂളിലെ ഒമ്പതാം തരം വിദ്യാര്‍ഥിനി സുഹാന (14) എന്നിവരെ പരുക്കുകളോടെ മെഡിക്കല്‍ കോളജ് ആശുപത്രിയില്‍  പ്രവേശിപ്പിച്ചു. സുഹാനയുടെ പരുക്ക് സാരമുള്ളതാണ്. എടവണ്ണപ്പാറ നിന്നും കോഴിക്കോട്ടേക്ക്  വരികയായിരുന്ന സ്വകാര്യ ബസ് മറ്റൊരു വാഹനത്തെ മറികടക്കുന്നതിനിടെ എതിര്‍ദിശയില്‍ വന്ന  പിക്കപ്പിലിടിക്കുകയായിരുന്നെന്നും ഇടിയുടെ കാരണത്താല്‍ റോഡരികിലൂടെ നടക്കുകയായിരുന്ന വിദ്യാര്‍ഥികള്‍ക്ക് പരുക്കേറ്റതായും നാട്ടുകാര്‍ പറഞ്ഞു. അപകടത്തില്‍ കുറ്റിക്കാട്ടൂര്‍ യതീംഖാനക്ക്  സമീപമുള്ള ബസ് വെയ്റ്റിങ് ഷെഡ് തകര്‍ന്നു.