വടകര: ഓര്‍ക്കാട്ടേരി-കുന്നുമ്മക്കര റോഡിലെ വന്‍കുഴികള്‍ ഗതാഗതം ദുഷ്‌കരമാക്കുന്നു. പൊതുമരാമത്ത് വകുപ്പിനു കീഴിലുള്ള ഈ റോഡുവഴി കിഴക്കന്‍ മേഖലയിലുള്ളവര്‍ക്ക് കുഞ്ഞിപ്പള്ളി, മോന്താല്‍ക്കടവ് ഭാഗത്തേക്ക് എളുപ്പം എത്തിപ്പെടാവുന്നതു കൊണ്ട് ഇവിടെ വാഹനത്തിരക്ക് ഏറെയാണ്.
എന്നാല്‍, കൃത്യമായി അറ്റകുറ്റപ്പണി നടത്താത്തതു കൊണ്ടു മഴ തുടങ്ങിയാല്‍ റോഡ് കുളമാകുന്ന അവസ്ഥയാണിവിടെ. നാലുമാസം മുന്‍പ് അനുവദിച്ച പത്തുലക്ഷം രൂപ ചെലവഴിച്ചു കുഴിയടക്കല്‍ നടത്തിയ റോഡ് മഴ ശക്തമായതോടെ പാടേ തകര്‍ന്നിരിക്കുകയാണ്. തുരുത്തിമുക്ക്-ഓര്‍ക്കാട്ടേരി റോഡിന്റെ സ്ഥിതിയും വ്യത്യസ്തമല്ല. ഏറാമല-ആദിയൂര്‍ ഭാഗംവരെ റോഡു തന്നെ ഇല്ലാത്ത അവസ്ഥയാണ്.
ഏറാമല റോഡിന്റെ നവീകരണത്തിനു മൂന്നു കോടി രൂപ അനുവദിച്ചിട്ടുണ്ടെങ്കിലും പണി ഇതുവരെ തുടങ്ങിയിട്ടില്ല. കുന്നുമ്മക്കര റോഡിനാകട്ടെ പ്രത്യേകം ഫണ്ടും ലഭിച്ചിട്ടില്ല. ഇവിടെ റോഡ് എന്നു ഗതാഗതയോഗ്യമാകുമെന്നാണു നാട്ടുകാര്‍ ചോദിക്കുന്നത്. മഴയത്തു കുഴികളില്‍ വെള്ളം നിറഞ്ഞതോടെ കാല്‍നടയാത്രപോലും ദുഷ്‌കരമായിട്ടുണ്ട്.