ന്യൂഡല്‍ഹി: മലയാളി താരം സഞ്ജു സാംസണ്‍ ഇന്ത്യന്‍ ടീമില്‍. ഏറെ കാലത്തിന് ശേഷമാണ് സഞ്ജു ഇന്ത്യന്‍ ജേഴ്‌സിയിലേക്ക് തിരികെയെത്തുന്നത്.

നിലവില്‍ രാജസ്ഥാന്‍ റോയല്‍സിന്റെ ക്യാപ്റ്റനായ സഞ്ജുവിന്റെ വമ്പനടികള്‍ പരമ്പരയില്‍ ഇന്ത്യയ്ക്ക് മുതല്‍ക്കൂട്ടാവും എന്നതിന്റെ അടിസ്ഥാനത്തിലാണ് താരം വീണ്ടും ടീമിലേക്കെത്തിയത് എന്നാണ് വിലയിരുത്തപ്പെടുന്നത്.

വിക്കറ്റ് കീപ്പറായും സഞ്ജുവിന്റെ സേവനം ടി20 ടീമിനുണ്ടാവും. വിശ്രമമനുവദിച്ച റിഷഭ് പന്തിന് പകരമാണ് സഞ്ജു ടീമിലേക്ക് മടങ്ങിയെത്തിയിരിക്കുന്നത്.

ടെസ്റ്റിലും ഏകദിനത്തിലും ടി20യിലും രോഹിത് ശര്‍മ തന്നെയാണ് ടീമിനെ നയിക്കുന്നത്. വിരാട് കോഹ്‌ലി ക്യാപ്റ്റന്‍ സ്ഥാനം രാജിവെച്ചതിന് പിന്നാലെയാണ് രോഹിത് റെഡ്‌ബോള്‍ ടീമിന്റെ നായകസ്ഥാനത്തേക്കെത്തിയത്. ബുംറയാണ് വൈസ് ക്യാപ്റ്റന്‍

ചേതേശ്വര്‍ പൂജാരെയും അജിന്‍ക്യ രഹാനെയും ടെസ്റ്റ് ടീമില്‍ നിന്നും ഒഴിവാക്കിയതാണ് ടെസ്റ്റ് ടീമില്‍ ബി.സി.സി.ഐ വരുത്തിയ ശ്രദ്ധേയമായ മാറ്റം. പ്രിയങ്ക് പാഞ്ചലാണ് ടീമിലെത്തിയ പുതുമുഖതാരം.