ന്യൂഡല്‍ഹി: പഞ്ചാബും ഉത്തര്‍പ്രദേശും ഇന്ന് പോളിങ് ബൂത്തിലേക്ക്. ഉത്തര്‍പ്രദേശില്‍ മൂന്നാംഘട്ട തെരഞ്ഞെടുപ്പാണ് നടക്കുന്നത്. പഞ്ചാബില്‍ 117 സീറ്റുകളിലേയ്ക്ക് ഒറ്റ ഘട്ടമായാണ് തെരഞ്ഞെടുപ്പ്. നേരത്തെ ഫെബ്രുവരി 14ന് നടക്കേണ്ട വോട്ടെടുപ്പ് ഗുരു രവിദാസ് ജയന്തി നടക്കുന്ന പശ്ചാത്തലത്തില്‍ മാറ്റിവെയ്ക്കാന്‍ രാഷ്ട്രീയപ്പാര്‍ട്ടികള്‍ ആവശ്യപ്പെടുകയായിരുന്നു. 1304 സ്ഥാനാര്‍ഥികളാണ് മത്സരരംഗത്തുള്ളത്.

യുപിയില്‍ മൂന്നാംഘട്ട തെരഞ്ഞെടുപ്പ് നടക്കുന്നത് 59 മണ്ഡലങ്ങളിലേയ്ക്കാണ്. 627 സ്ഥാനാര്‍ഥികള്‍ ജനവിധി തേടും. ഇതില്‍ 97 വനിതാ സ്ഥാനാര്‍ഥികളും ഉള്‍പ്പെടും. അഖിലേഷ് യാദവാണ് ഇന്ന് ജനവിധി തേടുന്നവരില്‍ പ്രമുഖന്‍. കര്‍ഹാള്‍ മണ്ഡലത്തില്‍ മത്സരിക്കുന്ന ഇദ്ദേഹത്തിനെതിരെ നിയമമന്ത്രി സത്യപാല്‍ സിംഗിനെയാണ് ബിജെപി മത്സരരംഗത്ത് നിര്‍ത്തിയിരിക്കുന്നത്. അഖിലേഷിന്റെ അമ്മാവന്‍ ശിവ്പാല്‍ സിംഗ് യാദവും ഇന്ന് ജനവിധി തേടുന്നുണ്ട്. രാവിലെ 7 മുതല്‍ വൈകീട്ട് ആറുവരെയാണ് പോളിങ്.