ബെംഗളൂരു: കര്‍ണാടകയിലെ ശിവമൊഗ്ഗയില്‍ ബജ്‌റംഗദള്‍ പ്രവര്‍ത്തകന്‍ കുത്തേറ്റുമരിച്ച സംഭവത്തില്‍ പ്രതിഷേധം ശക്തമാകുന്നു. പലയിടത്തും വാഹനങ്ങള്‍ക്കു തീവച്ചു. കൊലക്കേസില്‍ പൊലിസ് മൂന്ന് പേരെ അറസ്റ്റ് ചെയ്തു.

ഞായറാഴ്ച രാത്രി ഒന്‍പതു മണിയോടെയാണ് 26 വയസ്സുകാരനായ ഹര്‍ഷയെ അജ്ഞാതര്‍ കുത്തിപ്പരുക്കേല്‍പിച്ചത്. ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കൊലയ്ക്കു പിന്നാലെ പ്രദേശത്തെ വാഹനങ്ങള്‍ അജ്ഞാതര്‍ തീവച്ചു നശിപ്പിച്ചതായി പൊലീസ് അറിയിച്ചു.

അക്രമ സാധ്യതാ മേഖലകളില്‍ പൊലീസിനെ വിന്യസിച്ചു. നിയന്ത്രണങ്ങള്‍ക്കിടയിലും, കൊല്ലപ്പെട്ട യുവാവിന്റെ മൃതദേഹം വീട്ടിലേക്കു കൊണ്ടുപോകുമ്പോള്‍ നൂറുകണക്കിനു ബജ്‌റംഗദള്‍ പ്രവര്‍ത്തകര്‍ അനുഗമിച്ചു. ശിവമൊഗ്ഗയില്‍ പ്രതിഷേധക്കാരെ ഒഴിപ്പിക്കാന്‍ പൊലീസ് ആകാശത്തേക്കു വെടിയുതിര്‍ത്തു. കൊലപാതകവും കര്‍ണാടകയില്‍ ആളിക്കത്തുന്ന ഹിജാബ് വിവാദവും തമ്മില്‍ ബന്ധമില്ലെന്നാണു മന്ത്രിമാരുടെ നിലപാട്.