അന്യഗ്രഹ ജീവിയല്ല, ഹോളിവുഡ് സിനിമക്ക് വേണ്ടി മേക്ക്ഓവര്‍ നടത്തിയ കഥാപാത്രവുമല്ല, മനുഷ്യനാണ്. അലങ്കാര വാക്കുകള്‍ ആവശ്യമില്ലാത്ത പച്ച മനുഷ്യന്‍. ചിത്രം തായ്‌ലാന്‍ഡില്‍ നിന്നുള്ളതാണ്. ഭക്ഷണ വൈവിധ്യം തേടി നാട്ടിലെത്തിയവര്‍ക്ക് തായ്‌ലാന്‍ഡിന്റെ തനത് രുചി വിളമ്പുന്നതിനിടെ ചൂടിനെ, കരിയെ, പുകയെ പ്രതിരോധിക്കാന്‍ അവന്‍ കണ്ടെത്തിയ സാങ്കേതിക വിദ്യയാണ്. അടുക്കിവച്ച മണ്‍കലങ്ങളും പശ്ചാത്തലമൊരുക്കുന്ന പുകപടലവും അപരിചിതമായ ഹെല്‍മെറ്റുമൊരുക്കുന്ന ഫ്രെയിം ഫോട്ടോഗ്രാഫര്‍ക്കൊരു കൗതുകമെങ്കില്‍, അയാള്‍ക്കത് അയാളുടെ ജീവിതം തന്നെയാണ്. എത്ര കളര്‍ടോണ്‍ മാറ്റിയാലും തെളിയാത്ത പച്ചയായ ജീവിതം.