റിയാദ്: വനിതാ ശാക്തീകരണത്തിന്റെ ഭാഗമായി രാജ്യത്ത് വനിതകളെ സൈന്യത്തിലും നിയമനം നൽകുന്നു. സഊദി പ്രതിരോധ സേനയിലാണ് പുരുഷൻമാർക്കൊപ്പം വനിതകൾക്കുമുള്ള റിക്രൂട്ട്മെന്റ് ആരംഭിച്ചത്. ഇതിനായി ഇനി ഇരുകൂട്ടർക്കും പോർട്ടലിൽ അപേക്ഷ സമർപ്പിക്കാമെന്ന് പ്രതിരോധ മന്ത്രാലയം അറിയിച്ചു.

     സഊദി അറേബ്യൻ ആർമി, റോയൽ സഊദി എയർ ഡിഫൻസ്, റോയൽ സഊദി നേവി, റോയൽ സഊദി സ്ട്രാറ്റെജിക് മിസൈൽ ഫോഴ്‌സ്, റോയൽ സഊദി ആംഡ് മെഡിക്കൽ സർവ്വീസസ് എന്നീ വിഭാഗങ്ങളിൽ സൈനികൻ മുതൽ സർജന്റ് വരെയുള്ള സൈനിക റാങ്കുകൾ ലഭ്യമാകും.    

   എല്ലാ അപേക്ഷകരും നിർദ്ദിഷ്ട വ്യവസ്ഥകൾക്കനുസൃതമായി പ്രവേശന നടപടിക്രമങ്ങൾ പാസാക്കണം, സംശുദ്ധമായ റെക്കോർഡ് ഉണ്ടായിരിക്കണം, കൂടാതെ സേവനത്തിന് മെഡിക്കൽ യോഗ്യതയുള്ളവരുമായിരിക്കണമെന്നതടക്കമുള്ളതാണ് അപേക്ഷ സമർപ്പിക്കാൻ വേണ്ടതെങ്കിലും സ്ത്രീ അപേക്ഷകർക്ക് ചില അധിക മാനദണ്ഡങ്ങൾ ചേർത്തിട്ടുണ്ട്.  

    സഊദി വനിതാ അപേക്ഷകർ 21 നും 40 നും ഇടയിൽ പ്രായമുള്ളവരും 155 സെന്റിമീറ്റർ ഉയരം ഉള്ളവരായിരിക്കണം, സർക്കാർ ഉദ്യോഗസ്ഥരാകാൻ പാടില്ല. സ്വതന്ത്ര ദേശീയ തിരിച്ചറിയൽ കാർഡ് ഉണ്ടായിരിക്കണം കൂടാതെ കുറഞ്ഞത് ഒരു ഹൈസ്കൂൾ വിദ്യാഭ്യാസവും ഉണ്ടായിരിക്കണം. എന്നാൽ, വിദേശ പൗരന്മാരുമായി വിവാഹിതരായവർക്ക് സൈന്യത്തിൽ ചേരാനാകില്ല. പുരുഷന്മാരുടെ പ്രായപരിധി 17 നും 40 നും ഇടയിലാണെന്നും ഏറ്റവും കുറഞ്ഞ ഉയരം 160 സെന്റ്റീമീറ്ററാണെന്നും മന്ത്രാലയം വ്യക്തമാക്കി.