സുറാബ്

ഏടേപ്പാ പോന്നത്
ഏട്ടീനെ കാണാനോ,
അപ്പം ചുട് അടയും ചുട്
ചക്കരയും ചക്ലിയും എട്ത്ത് വെക്ക്...

അമ്മാമനെ കാണേണ്ടേ,
പോന്ന ബൈക്കല്ലേ അപ്യേളും,
കുടുംബം രണ്ടായി കാണല്ലാ
കാര്‍ന്നോമ്മാര് കോപിക്കും....

ഏട്ടിക്കിപ്പളും പേറ്ണ്ടാ
ഇപ്പം എത്തറ പിള്ളേരായ്
പേറ് പറഞ്ഞാ കലമ്പ്യത്
എന്നിട്ടും അമ്മ കരഞ്ഞില്ലേ....

വരുമ്പം കൊര്‍ച്ച് കൊയമ്പെടുത്തോ
കൂവ്വപ്പൊടിയും മഞ്ഞപ്പൊടിയും
ഏട്ടന്റച്ഛന്‍ വൈശ്യരല്ലേ
ഏട്ടനും അനിയനും സുഖല്ലേ....

ശ്വാസംമുട്ട്ന്ന് പിള്ളേര്‍ക്ക്
ഈടയിണ്ടൊരാള് കെട്ട്യോനായി
ശ്വാസം നിലച്ചാലും അറിയില്ല
കൂലിപ്പണിക്കും പോകില്ല....

അന്തിക്ക് തിരിവെച്ച ആകാശം
തപ്പിത്തടയുന്ന കാര്‍മേഘം
കാറ്റിലും കൂറ്റിലും കള്ളുണ്ട്
വഴിനീളെ കാരമുള്ളുണ്ട്....