കൊല്‍ക്കത്ത: രാജ്യം കണ്ട ഏറ്റവും വലിയ കലാപകാരിയാണ് പ്രധാനമന്ത്രി നരേന്ദ്രമോദിയെന്ന് പശ്ചിമബംഗാള്‍ മുഖ്യമന്ത്രി മമതാ ബാനര്‍ജി. അമേരിക്കയില്‍ ട്രംപിന് ഉണ്ടായതിനേക്കാള്‍ മോശമായ ദുര്‍വിധിയാണ് മോദിക്കു വരാനിരിക്കുന്നതെന്നും ഹൂഗ്ലിയില്‍ തൃണമൂല്‍ റാലിയെ അഭിസംബോധന ചെയ്ത മമത പറഞ്ഞു. തന്റെ അനന്തരവന്‍ അഭിഷേക് ബാനര്‍ജി എം.പിയുടെ ഭാര്യ രുചിറയെ കല്‍ക്കരി തട്ടിപ്പ് കേസില്‍ സി.ബി.ഐ ചോദ്യം ചെയ്ത സംഭവമാണ് മമതയെ ചൊടിപ്പിച്ചത്. 

 

നിയമസഭാ തെരഞ്ഞെടുപ്പില്‍ താനായിരിക്കും ഗോള്‍ കീപ്പര്‍. ബി.ജെ.പിക്ക് ഒരു ഗോള്‍ പോലും അടിക്കാന്‍ കഴിയില്ല. തന്നെ കൊല്ലാം, അടിക്കാം പക്ഷേ തന്റെ മരുമകളെ അപമാനിക്കാന്‍ കഴിയുമോ. അവളെ കല്‍ക്കരി കള്ളി എന്നു വിളിക്കാമോ? നിങ്ങള്‍ ഞങ്ങളുടെ അമ്മമാരെയും മക്കളെയും കല്‍ക്കരി മോഷ്ടാക്കള്‍ എന്നു വിളിക്കുകയാണ്. അസുരന്മാരാണ് രാജ്യം ഭരിക്കുന്നത്. അവര്‍ നമ്മുടെ നട്ടെല്ല് തകര്‍ക്കാന്‍ ശ്രമിക്കും. ബംഗാള്‍ പിടിച്ചെടുക്കാന്‍ നോക്കും. പക്ഷെ നിങ്ങള്‍ എന്താണു ചെയ്യേണ്ടത്. ബി.ജെ.പി എന്തു ചെയ്താലും ബംഗാള്‍ ബംഗാളായി തുടരണം. ബംഗാളിനെ ഒരിക്കലും ഗുജറാത്ത് ഭരിക്കാന്‍ അനുവദിക്കില്ലെന്നും മമത പറഞ്ഞു.