റിയാദ്: സഊദി വത്കരണ പദ്ധതിയായ നിത്വാഖാത്തിൽ ടെലികോം, ഐ.ടി മേഖലയിലെ കൂടുതൽ സെക്ഷനുകൾ ഉൾപ്പെടുത്തി വിപുലീകരിച്ചു. മാനവശേഷി, സാമൂഹിക വികസന മന്ത്രി എന്‍ജിനീയര്‍ അഹ്മദ് അല്‍റാജ്ഹിയാണ് ഇതിന് ഉത്തരവ് നൽകിയത്. പുതിയ മാനദണ്ഡം പ്രകാരം ഇനി മുതൽ നിത്വാഖാത്തില്‍ ടെലികോം, ഐ.ടി എന്ന മേഖല പൊതുവായി ഉണ്ടാകുന്നതിന് പകരം ഇതിൽ ഉൾപ്പെട്ട ഓരോ കാറ്റഗറിയും വ്യത്യസ്തമായി ഉൾപ്പെടുത്തി വിപുലീകരിച്ചാണ് നിത്വാഖാതിൽ ഉൾപ്പെടുക. ഇതോടെ ഓരോ മേഖലയിലും സഊദി വത്കരണം ശക്തിപ്പെടുത്താനാണ് മന്ത്രാലയ ശ്രമം. 

     ടെലികോം ഐടി മേഖലകൾക്ക് പകരമായി ഇനി ഐ.ടി ഓപ്പറേഷന്‍സ്-റിപ്പയര്‍, ടെലികോം ഓപ്പറേഷന്‍സ്-റിപ്പയര്‍, ഐ.ടി ഇന്‍ഫ്രാസ്ട്രക്ചര്‍, ടെലികോം ഇന്‍ഫ്രാസ്ട്രക്ചര്‍, ഐ.ടി സൊല്യൂഷന്‍സ്, ടെലികോം സൊല്യൂഷന്‍സ്, പോസ്റ്റല്‍ സേവനം എന്നീ ഏഴു മേഖലകളാണ് നിതാഖാത്തില്‍ പുതുതായി സൃഷ്ടിച്ചിരിക്കുന്നത്. ഓരോ മേഖലക്കും പ്രത്യേകം സഊദി വത്കരണം കൊണ്ട് വരാനാണ് പുതിയ നീക്കം. മാനവശേഷി, സാമൂഹിക വികസന മന്ത്രാലയവും കമ്മ്യൂണിക്കേഷന്‍സ് ആന്റ് ഇന്‍ഫര്‍മേഷന്‍ ടെക്‌നോളജി മന്ത്രാലയവും മാനവശേഷി വികസന നിധിയും സഊദി കൗണ്‍സില്‍ ഓഫ് ചേംബേഴ്‌സിലെ നാഷണല്‍ ടെലികോം, ഐ.ടി കമ്മിറ്റിയും തമ്മിലുള്ള സഹകരണത്തിന്റെ തുടര്‍ച്ചയെന്നോണമാണ് പുതിയ ഭേദഗതികൾ.

     പുതിയ ഭേദഗതികള്‍ പ്രകാരം ഐ.ടി സൊല്യൂഷന്‍സ് മേഖലയില്‍ പ്രവര്‍ത്തിക്കുന്ന ആറു മുതല്‍ 49 വരെ ജീവനക്കാരുള്ള ചെറുകിട സ്ഥാപനങ്ങള്‍ 19 ശതമാനം വരെ സഊദിവല്‍ക്കരണം പാലിച്ചാല്‍ ചുവപ്പിലായിരിക്കും ഉൾപ്പെടുക. 20 മുതല്‍ 27 വരെ ഇളം പച്ച, 28 മുതല്‍ 37 ഇടത്തരം പച്ച, 38 മുതല്‍ 54 വരെ കടും പച്ച, 55 ശതമാനവും അതില്‍ കൂടുതലും ആണെങ്കിൽ പ്ലാറ്റിനം വിഭാഗത്തിലുമാകും.

   ഐ.ടി ഓപ്പറേഷന്‍സ്, റിപ്പയര്‍ മേഖലയില്‍ പ്രവര്‍ത്തിക്കുന്ന ചെറുകിട സ്ഥാപനങ്ങളില്‍ സഊദിവല്‍ക്കരണം 16 ശതമാനം വരെയായാല്‍ ചുവപ്പിലും 17 മുതല്‍ 20 ശതമാനം വരെ ഇളം പച്ച, 21 മുതല്‍ 25 ശതമാനം വരെ ഇടത്തരം പച്ച, 26 മുതല്‍ 34 ശതമാനം വരെ കടും പച്ച 35 ശതമാനവും അതില്‍ കൂടുതലുമായാല്‍ പ്ലാറ്റിനം വിഭാഗത്തിലുമാകും. ശഅ്ബാന്‍ ഒന്നു (മാര്‍ച്ച് 14) മുതല്‍ ഇത് പ്രാബല്യത്തില്‍വരുമെന്ന് മന്ത്രാലയം അറിയിച്ചു.