കീവ്: ഉക്രൈയ്‌നിന്റെ ഒരു നഗരം കൂടി പിടിച്ചെടുത്ത് റഷ്യ. ബെര്‍ദ്യാന്‍സ്‌ക് നഗരമാണ് റഷ്യ പിടിച്ചെടുത്തത്. നഗരം പൂര്‍ണമായും റഷ്യയുടെ നിയന്ത്രണത്തിലായതായി മേയര്‍ അറിയിച്ചു.

തെക്കന്‍ നഗരങ്ങളായ ഖേര്‍സണ്‍, ബെര്‍ദ്യാന്‍സ്‌ക് എന്നീ നഗരങ്ങള്‍ പൂര്‍ണമായും പിടിച്ചെടുത്തെന്ന് അവകാശപ്പെട്ട് റഷ്യ കഴിഞ്ഞ ദിവസം തന്നെ രംഗത്തെത്തിയിരുന്നു. ഖേര്‍സണിന് സമീപമുള്ള ഹെനിചെസ്‌ക്, ചൊര്‍ണോബയീവ്ക നഗരങ്ങളുടെ വ്യോമപാത പിടിച്ചെടുത്തതായും റഷ്യ അവകാശപ്പെട്ടിരുന്നു. കഴിഞ്ഞ രണ്ട് ദിവസങ്ങളായി ഖേര്‍സണ്‍ പിടിച്ചെടുക്കാനുള്ള റഷ്യയുടെ ആക്രമണം അതിരൂക്ഷമായിരുന്നു. തെരുവുകളില്‍ റഷ്യന്‍ ടാങ്കുകളും സാധാരണക്കാരുടെ തലയക്ക് മുകളിലൂടെ ഫൈറ്റര്‍ ജെറ്റുകളും പായുന്നതായിരുന്നു സാഹചര്യം.