റിയാദ്: സഊദിയുടെ വിർച്വൽ ആശുപത്രി ഉദ്ഘാടനം ചെയ്തു. ആരോഗ്യമന്ത്രി ഫഹദ് അൽ ജലാജെൽ, കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്‌നോളജി മന്ത്രി എൻജിനീയർ അബ്ദുല്ല അൽ സവാഹ, ഡിജിറ്റൽ ഗവൺമെന്റിനായുള്ള ജനറൽ അതോറിറ്റി ഗവർണർ എൻജിനിയർ അഹമ്മദ് അൽ സുവയാൻ എന്നിവർ ചേർന്നാണ് തിങ്കളാഴ്ച ഉദ്ഘാടനം ചെയ്തത്. വെർച്വൽ മെഡിസിൻ ആപ്ലിക്കേഷനുകൾ വർദ്ധിപ്പിക്കുകയും പൗരന്മാരുടെ സേവനത്തിൽ മികച്ച വെർച്വൽ ആരോഗ്യ സേവനങ്ങൾ നൽകുകയും ലക്ഷ്യം വെച്ചാണ് മിഡിൽ ഈസ്റ്റിൽലെ ആദ്യ സംരംഭവും ലോകത്തെ ഏറ്റവും വലുതുമായ വെർച്വൽ ഹോസ്പിറ്റൽ ആരംഭിച്ചത്.

സഊദി വിഷൻ 2030 ന്റെ ലക്ഷ്യങ്ങൾ കൈവരിക്കുന്നതിന് അനുസൃതമായി വരുന്നതാണ് വെർച്വൽ ഹോസ്പിറ്റൽ. വിശിഷ്‌ട സേവനങ്ങളിലേക്ക് സമയബന്ധിതമായി പ്രവേശനം സുഗമമാക്കുന്നതിന് ഏറ്റവും പുതിയ വെർച്വൽ ഹെൽത്ത് കെയർ സാങ്കേതികവിദ്യകൾ ഗുണപരമായ രീതിയിൽ പ്രയോജനപ്പെടുത്തുന്നതിന്റെ ഉദാഹരണമാണ് ഈ ആശുപത്രിയെന്ന് ആരോഗ്യ മന്ത്രി പറഞ്ഞു.

പ്രതിവർഷം 500,000 ഗുണഭോക്താക്കളെ ഉൾക്കൊള്ളുന്ന ഈ വിർച്വൽ ആശുപത്രിയിൽ 34 ഉപ-സ്പെഷ്യാലിറ്റികളും പ്രത്യേക വിഭാഗങ്ങളും ഉണ്ടാകും. രോഗിക്ക് കൂടിയാലോചനകൾ നേടുന്നതിനും പരിഹാരങ്ങൾ കണ്ടെത്തുന്നതിനും സഹായിക്കുന്ന തരത്തിലാണ് പദ്ധതി. അദ്ദേഹം ചൂണ്ടിക്കാട്ടി. ഡോക്‌ടർമാർക്കും സ്പെഷ്യലിസ്റ്റുകൾക്കുമിടയിൽ വൈദഗ്‌ധ്യം കൈമാറ്റം ചെയ്യുന്നതിനും കൂടാതെ ടെലിമെഡിസിൻ മുഖേന എല്ലാ നഗരങ്ങളിലും ഗ്രാമങ്ങളിലും മികച്ച കൺസൾട്ടന്റുമാരെ നൽകുന്നതിന് പുറമേ, വിദൂരമായി ഡോക്ടർമാരുമായുള്ള ആശയവിനിമയത്തിനായും സാധ്യമാകും.

130-ലധികം ആശുപത്രികളുടെയും നിരവധി അപൂർവ സ്പെഷ്യാലിറ്റികളുടെയും ശൃംഖലയുമായി ഹോസ്പിറ്റൽ സഹകരിക്കുന്നുണ്ട്. ഇലക്ട്രോ എൻസെഫലോഗ്രാം രോഗികൾക്കുള്ള വെർച്വൽ സേവനം, വെർച്വൽ ക്ലിനിക്കുകൾ, സ്ട്രോക്ക് രോഗികൾക്കുള്ള വെർച്വൽ സേവനം, ഗുരുതരമായ പരിചരണ രോഗികൾക്ക് വെർച്വൽ സേവനം, വെർച്വൽ റേഡിയോളജി സേവനം എന്നിവ ആശുപത്രി നൽകുന്ന സേവനങ്ങളിൽ ഉൾപ്പെടുന്നു.