സെക്രട്ടേറിയറ്റിനു മുന്നിൽ
അരങ്ങേറിയത്
നാടകീയ രംഗങ്ങൾ
തിരുവനന്തപുരം
ഭിന്നശേഷിക്കാർ സെക്രട്ടേറിയറ്റിനു മുന്നിൽ തുടങ്ങിയ അനിശ്ചിതകാല സമരത്തിനിടെ നാടകീയ രംഗങ്ങൾ. ഇന്നലെ സമരത്തിനിടെ ' മൂന്ന് പേർ ആത്മഹത്യയ്ക്ക് റെഡിയാണ്... രണ്ടു പേർ കൂടി മുന്നോട്ടു വരണം. പെട്രോൾ വാങ്ങാൻ പോയിട്ടുണ്ട് 'എന്നു സമരക്കാർ മൈക്കിൽ അനൗൺസ് ചെയ്തതാണ് നാടകീയ രംഗങ്ങൾക്കിടയാക്കിയത്. അപകടം മണത്ത് പൊലിസ് ഫയർഫോഴ്‌സിനെ വിവരമറിയിച്ചു. ഫയർഫോഴ്‌സ് യൂനിറ്റും കൂടുതൽ പൊലിസും സ്ഥലത്തെത്തി. ഇതിനിടയിൽ സമരക്കാരിൽ ഒരാൾ പൊലിസ് ബാരിക്കേഡിനു മുകളിൽ കയറി ഇരിപ്പായി. സംഘർഷഭരിതമായ അന്തരീക്ഷത്തിനിടെ പൊലിസ് ഉദ്യോഗസ്ഥർ സമരക്കാരുടെ നേതാക്കളുമായി സംസാരിച്ചതിനെ തുടർന്നാണ് പിരിമുറുക്കത്തിന് അയവുവന്നത്. നേരത്തെ സെക്രട്ടേറിയറ്റിലേക്ക് പ്രകടനമായി വരുന്നതിനിടെ, ബസ് മുന്നോട്ടെടുത്തത് സമരക്കാരെ പ്രകോപിപ്പിച്ചിരുന്നു. തുടർന്ന് ഇവർ് സെക്രട്ടേറിയറ്റിനു മുന്നിലെ എം.ജി റോഡ് പൂർണമായും ഉപരോധിച്ചു. എം.ജി റോഡിൽ വൻ ഗതാഗതക്കുരുക്ക് ഉണ്ടായതിനെ തുടർന്ന് പൊലിസ് ഇടപെട്ടാണ് ഉപരോധം അവസാനിപ്പിച്ചത്.
നിയമനവുമായി ബന്ധപ്പെട്ട ആവശ്യങ്ങൾ ഉന്നയിച്ചാണ് താൽക്കാലിക ജോലിക്കാരായ ഭിന്നശേഷിക്കാരുടെ സംയുക്തകൂട്ടായ്മ സെക്രട്ടേറിയറ്റിനു മുന്നിൽ സമരം തുടങ്ങിയത്. സംഘട രക്ഷാധികാരി അബ്ദുൽഷുക്കൂർ സമരം ഉദ്ഘാടനം ചെയ്തു. എംപ്ലോയ്‌മെന്റ് എക്‌സ്‌ചേഞ്ചുകൾ മുഖേന താൽക്കാലിക ജോലി ചെയ്ത് പിരിച്ചുവിടപ്പെട്ട ഭിന്നശേഷിക്കാരെ പുനർനിയമനം നൽകി സ്ഥിരപ്പെടുത്തണമെന്നതുൾപ്പെടെയുള്ള ആവശ്യങ്ങൾ ഉന്നയിച്ചാണ് സമരം.