കായംകുളം: സ്‌കൂള്‍, കോളജ് വിദ്യാര്‍ഥികള്‍ക്ക് കഞ്ചാവ് വില്‍ക്കുന്ന രണ്ട് വിദ്യാര്‍ഥികളെ എക്‌സൈസ് അറസ്റ്റു ചെയ്തു. ബിരുദ വിദ്യാര്‍ഥിയായ കണ്ണമ്പള്ളി ഭാഗം പുളിയനയ്യത്ത് വീട്ടില്‍  ഷാനുമോന്‍ (21), കംപ്യൂട്ടര്‍ ഡിസൈനര്‍ വിദ്യാര്‍ഥിയായ ഓച്ചിറ നന്ദനത്ത് വീട്ടില്‍  ആദര്‍ശ് (21) എന്നിവരാണ് പിടിയിലായത്.
കൃഷ്ണപുരം കാപ്പില്‍ ഭാഗത്ത് വീട് വാടകക്ക് എടുത്ത് താമസിക്കുകയായിരുന്നു ഇവര്‍. സ്‌കൂളിനു സമീപം ബൈക്കിലെത്തുന്ന സംഘം പ്ലസ്ടു വിദ്യാര്‍ഥികള്‍ക്ക് കഞ്ചാവ് നല്‍കുന്നതായി എക്‌സൈസ് കമ്മീഷണര്‍ക്ക് കഴിഞ്ഞ ദിവസം രഹസ്യ വിവരം ലഭിച്ചിരുന്നു. കമ്മീഷണറുടെ നിര്‍ദേശ പ്രകാരം  ഇവര്‍ താമസിച്ചിരുന്ന വീട് എക്‌സൈസ് ഷാഡോ ടീം നിരീക്ഷിച്ചു വരുന്നതിനിടയിലാണ് ചില്ലറ വില്‍പ്പനക്കാരായ ഇവര്‍ വിദ്യാര്‍ഥികള്‍ക്ക് നല്‍കിയതിന്റെ ബാക്കി 10 ഗ്രാം കഞ്ചാവുമായി വലയില്‍ കുടുങ്ങിയത്. എക്‌സൈസ് എസ്.ഐ ഇ.ആര്‍ ഗിരീഷ് കുമാറിന്റെ നേതൃത്വത്തിലുള്ള സംഘം വീട് റെയ്ഡ് ചെയ്ത് ഇവരെ പിടികൂടുകയായിരുന്നു. ഇവര്‍ ഉപയോഗിച്ചിരുന്ന ബൈക്കും കസ്റ്റഡിയില്‍ എടുത്തു. കരുനാഗപ്പള്ളിയില്‍ പേരറിയാത്ത ഒരാളിനിന്നും 150 രൂപക്ക് വാങ്ങുന്ന കഞ്ചാവ് ചെറിയ പൊതികളാക്കി 250 മുതല്‍ 400 രൂപക്ക് വരെ വില്‍ക്കാറുണ്ടെന്നും ആവശ്യക്കാര്‍ ഫോണില്‍ ബന്ധപ്പെടുമ്പോള്‍ എത്തിച്ചു കൊടുക്കുകയാണ് ചെയ്യുന്നതെന്നും ഇവര്‍ മൊഴിനല്‍കിയിട്ടുണ്ട്. ഇവര്‍ക്ക് കഞ്ചാവ് നല്‍കുന്നവരെ കുറിച്ചുള്ള സൂചനകള്‍  ലഭിച്ചിട്ടുണ്ടെന്നും ഉടനടി  പിടികൂടുമെന്നും എസ്.ഐ ഇ.ആര്‍ ഗിരീഷ് കുമാര്‍ പറഞ്ഞു. വിദ്യാര്‍ഥികള്‍ക്ക് കഞ്ചാവ് നല്‍കുന്ന സംഘം കായംകുളം കേന്ദ്രീകരിച്ച് തമ്പടിച്ചിരിക്കുന്നതായി വിവരം ലഭിച്ചതിനെ തുടര്‍ന്ന് ഷാഡോ ടീം വിദ്യാര്‍ഥികളെ കുറച്ച് നാളായി നിരീക്ഷിച്ച ുവരികയായിരുന്നു.
എക്‌സൈസ് ഓഫീസിനു സമീപം ഐക്യജംഗ്ഷന്‍ പുളിമുക്ക്, ചേലപ്പുറം, മെറ്റല്‍ ക്രഷര്‍ എന്നീഭാഗങ്ങള്‍ കേന്ദ്രീകരിച്ചാണ് കഞ്ചാവ് മാഫിയ തമ്പടിച്ചിരിക്കുന്നതെന്ന് എക്‌സൈസ് കമ്മീഷണര്‍ക്ക് വിവരം ലഭിച്ചിട്ടുണ്ട്. ഇതേതുടര്‍ന്ന് ഈപ്രദേശങ്ങള്‍ കുറച്ചുനാളായി പ്രത്യേക സ്‌ക്വാഡിന്റെ നിരിക്ഷണത്തിലാണ്.