ന്യൂ ഡെൽഹി
ടി20 ലോകകപ്പിലെ പാകിസ്താനെതിരായ തോൽവിക്ക് ശേഷമുള്ള ഓൺലൈൻ അധിക്ഷേപത്തിനെതിരേ ആഞ്ഞടിച്ചു ഇന്ത്യൻ പേസ് ബൗളർ മുഹമ്മദ് ഷമി. ഇന്ത്യൻ തോൽവിക്ക് പിന്നാലെ കടുത്ത വിദ്വേഷ പ്രചാരണമാണ് ഷമിക്കെതിരേ സമൂഹമാധ്യമങ്ങളിലൂടെ നടന്നത്. തന്നെ ട്രോളിയവർ യഥാർഥ ഇന്ത്യക്കാരല്ലെന്ന് ഒരു ദേശീയ ദിനപത്രത്തിന് നൽകിയ അഭിമുഖത്തിൽ ഷമി വ്യക്തമാക്കി. അജ്ഞാതരായ സമൂഹമാധ്യമ പ്രൊഫൈലുകൾക്ക് ആരുടെ നേരെ വിരൽ ചൂണ്ടുമ്പോഴും അവർക്ക് ഒന്നും നഷ്ടപ്പെടാനില്ല. രാജ്യത്തോടുള്ള തന്റെ കൂറ് ആരോടും തെളിയിക്കേണ്ട ആവശ്യമില്ല. ഞങ്ങൾ എന്താണെന്ന് ഞങ്ങൾക്കറിയാം, ഇന്ത്യ ഞങ്ങൾക്ക് എന്താണ് അർഥമാക്കുന്നതെന്നും ഞങ്ങൾ പറയേണ്ടതില്ല, കാരണം ഞങ്ങൾ രാജ്യത്തെ പ്രതിനിധീകരിക്കുകയും രാജ്യത്തിനായി പോരാടുകയും ചെയ്യുന്നുണ്ടെന്നും ഷമി പറഞ്ഞു.