പ്രത്യേക ലേഖകൻ
കൊച്ചി
കേരളത്തിൽ സി.പി.എമ്മിന്റെ മുഖ്യശത്രു കോൺഗ്രസാണെങ്കിലും പാർട്ടിയുടെ സംസ്ഥാന സമ്മേളനം ഉദ്ഘാടനം ചെയ്ത് ജനറൽ സെക്രട്ടറി സീതാറാം യെച്ചൂരി നടത്തിയ പ്രസംഗത്തിലെവിടെയും കോൺഗ്രസിനെ പരാമർശിച്ചില്ല. കോൺഗ്രസ് ബന്ധം സംബന്ധിച്ച് യെച്ചൂരിയടക്കമുള്ള ചില ദേശീയ നേതാക്കളും കേരള ഘടകവും തമ്മിൽ രൂക്ഷമായ അഭിപ്രായഭിന്നത നിലനിൽക്കുന്ന സാഹചര്യത്തിലാണ് കോൺഗ്രസിനെ തൊടാതെയുള്ള യെച്ചൂരിയുടെ പ്രസംഗം.

പ്രസംഗത്തിലുടനീളം കേന്ദ്രത്തിലെ ബി.ജെ.പി സർക്കാരിനെ ആക്രമിക്കുകയായിരുന്നു യെച്ചൂരി. ഒപ്പം അമേരിക്കൻ സാമ്രാജ്യത്വത്തിനെതിരേയുമുണ്ടായിരുന്നു വിമർശനം. രണ്ടിനെയും ബന്ധിപ്പിക്കാനും അദ്ദേഹം ശ്രദ്ധിച്ചു. അമേരിക്കൻ സാമ്രാജ്യത്വത്തോട് വിധേയത്വമുള്ള രാജ്യമാക്കി ഇന്ത്യയെ മാറ്റാൻ മോദി ഭരണകൂടം ശ്രമിക്കുന്നു എന്ന് അദ്ദേഹം ആരോപിച്ചു.
ഇതിനിടെ കോൺഗ്രസുമായുള്ള സഹകരണത്തെക്കുറിച്ച് യെച്ചൂരി പറയാതെ പറയുകയും ചെയ്തു. ബി.ജെ.പിക്കെതിരേ എല്ലാ ജനാധിപത്യ ശക്തികളെയും ഒരുമിപ്പിക്കേണ്ടതുണ്ട്. തെരഞ്ഞെടുപ്പുകൾ വരുമ്പോൾ ബി.ജെ.പി വിരുദ്ധ വോട്ടുകൾ പരമാവധി ഏകോപിപ്പിക്കണമെന്നും യെച്ചൂരി പറഞ്ഞു.

അമേരിക്കയുടെ ജൂനിയർ പ്രതിനിധിയാക്കി ഇന്ത്യയെ മാറ്റാനുള്ള ശ്രമത്തിലാണ് മോദി സർക്കാർ. ജമ്മു കശ്മിരിനെ ഇല്ലാതാക്കി. പൗരത്വ നിയമ ഭേദഗതി കൊണ്ടുവന്നു. തെരഞ്ഞെടുപ്പ് കമ്മിഷനെ രാഷ്ട്രീയ താൽപര്യങ്ങൾക്കായി ഉപയോഗിക്കുന്നു. ബി.ജെ.പിക്കും ആർ.എസ്.എസിനുമെതിരേ വിശാലമായ ഇടതു മതേതര ജനാധിപത്യ ഐക്യം ശക്തിപ്പെടുത്താൻ ബദൽനയം ആവശ്യമാണ്. ശാസ്ത്രബോധത്തെയും ചരിത്രബോധത്തെയും നിരാകരിച്ച് മനുസ്മൃതി നടപ്പിലാക്കാൻ ശ്രമിക്കുന്ന ബി.ജെ.പി സർക്കാരിന്റെ നടപടികളെ പ്രത്യയശാസ്ത്രപരമായി നേരിടേണ്ടതുണ്ട്. ദേശീയ വിദ്യാഭ്യാസ നയത്തിലൂടെ ഹിന്ദുപുരാണത്തിലെ സങ്കൽപങ്ങളെ ചരിത്രത്തിന് പകരമായി അവതരിപ്പിക്കാനാണ് അവർ ശ്രമിക്കുന്നത്.ഉക്രൈനു നേരെയുള്ള ആക്രമണത്തിൽ റഷ്യ സങ്കുചിത ദേശീയവാദം പ്രയോഗിക്കുകയാണ്. ഉക്രൈനിൽ കുടുങ്ങിയ ഇന്ത്യക്കാരെ നാട്ടിലെത്തിക്കുന്നതിൽ കേന്ദ്ര ഭരണകൂടം പരാജയപ്പെട്ടെന്നും സീതാറാം യെച്ചൂരി പറഞ്ഞു.