ന്യൂയോര്‍ക്ക്: കൊവിഡ് മഹാമാരി ലോക സാമ്പത്തികരംഗത്തെ പിടിച്ചുലക്കുമ്പോഴും ഇന്ത്യന്‍ ശതകോടീശ്വരന്മാര്‍ മുന്നോട്ടു തന്നെ. ഹുറൂന്‍ ഗ്ലോബല്‍ റിച്ച് ലിസ്റ്റ് 2021 പുറത്തുവിട്ട പുതിയ പട്ടികയില്‍ റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനിയാണ് ലോക കോടീശ്വരന്മാരില്‍ എട്ടാം സ്ഥാനത്ത്. 8,300 കോടി ഡോളറാണ് (6,05,900 കോടി രൂപ) ആസ്തി. ഗൗതം അദാനി (2.34 ലക്ഷം കോടി രൂപ), ശിവ് നാടാര്‍ (1.94 ലക്ഷം കോടി രൂപ), ലക്ഷ്മി മിത്തല്‍ (1.40 ലക്ഷം കോടി രൂപ), സൈറസ് പൂനവാല (1.35 ലക്ഷം കോടി രൂപ), ഹിന്ദുജ സഹോദരന്മാര്‍ (1.31 ലക്ഷം കോടി രൂപ), ഉദയ് കൊട്ടക് (1.08 ലക്ഷം കോടി രൂപ) എന്നിവരാണ് പട്ടികയിലെ മറ്റു ഇന്ത്യക്കാര്‍.
പട്ടിക പ്രകാരം ഇന്ത്യയില്‍ 209 കോടീശ്വരന്മാരുണ്ട്. ഓരോ ആഴ്ചയിലും ഇന്ത്യയില്‍ നിന്നുള്ള ഓരോ കോടീശ്വരന്മാര്‍ പട്ടികയില്‍ ഇടംപിടിക്കുകയാണ്. കൊവിഡ് ബിസിനസ് രംഗത്തെ വരിഞ്ഞുമുറുക്കിയ 2020ല്‍ ഇന്ത്യയിലുണ്ടായത് 40 പുതിയ കോടീശ്വരന്മാരാണ്. കോടീശ്വരന്മാരുടെ എണ്ണത്തില്‍ യു.എസിനെ ഇന്ത്യ പിന്നിലാക്കിയിട്ടുമുണ്ട്. ഇതില്‍ 60 പേര്‍ മുംബൈക്കാരാണ്.

സൈറസ് പൂനവാല കൊവിഡ് വാക്‌സിന്‍ നിര്‍മാതാക്കളായ സിറം ഇന്‍സ്റ്റിറ്റ്യൂട്ട് ഓഫ് ഇന്ത്യ ഉള്‍പ്പെടുന്ന പൂനവാല ഗ്രൂപ്പ് ചെയര്‍മാനാണ്.
പട്ടിക അനുസരിച്ച് ടെസ്‌ല സി.ഇ.ഒ ഇലോണ്‍ മസ്‌കാണ് ലോകത്തെ അതിസമ്പന്നന്‍. 19,700 കോടി ഡോളറാണ് ആസ്തി. ആമസോണ്‍ സി.ഇ.ഒ ജെഫ് ബെസോസാണ് രണ്ടാമത് (18,900 കോടി ഡോളര്‍). ബില്‍ ഗേറ്റ്‌സ്, മാര്‍ക് സുക്കര്‍ബര്‍ഗ് എന്നിവര്‍ യഥാക്രമം നാല്, അഞ്ച് സ്ഥാനങ്ങളിലാണ്.