കോഴിക്കോട്: സ്ഥാനാര്‍ഥി പട്ടികയ്ക്ക് അന്തിമരൂപം നല്‍കാന്‍ സംസ്ഥാന സെക്രട്ടറിയേറ്റ് യോഗം ഇന്ന് ചേരും. ജില്ലാ ഘടകങ്ങളില്‍ നിന്നുള്ള ശുപാര്‍ശയും അഭിപ്രായങ്ങളും ചര്‍ച്ച ചെയ്യും. പ്രധാന നേതാക്കളെ അടക്കം സ്ഥാനാര്‍ഥി പട്ടികയില്‍ ഒഴിവാക്കിയതിനെതിരെ വലിയ പ്രതിഷേധമാണ് പല ജില്ലകളിലും ഉണ്ടായത്.

വിവിധ ജില്ലാ കമ്മിറ്റികളുടെ യോഗത്തിനു ശേഷം ഉയര്‍ന്ന അഭിപ്രായങ്ങള്‍കൂടി കണക്കിലെടുത്തായിരിക്കും തീരുമാനം. രണ്ടുടേം വ്യവസ്ഥയില്‍ ആര്‍ക്കും ഇളവ് നല്‍കില്ലെന്ന കാര്യം ഉറപ്പായിക്കഴിഞ്ഞു.

തരൂരില്‍ എ കെ ബാലന്റെ ഭാര്യ ഡോ. പി കെ ജമീലയെ സ്ഥാനാര്‍ത്ഥി പട്ടികയില്‍ നിന്ന് ഒഴിവാക്കിയ പാലക്കാട് ജില്ലാ സെക്രട്ടേറിയറ്റ് നിലപാടിലെ തീരുമാനമാകും നിര്‍ണായകം. ചെങ്ങനാശ്ശേരി സീറ്റിനെ ചൊല്ലിയുള്ള സിപിഐ കേരളാ കോണ്‍ഗ്രസ് എം ഭിന്നതയ്ക്കും ഇന്ന് പരിഹാരമുണ്ടായേക്കും.