ശഫീഖ് പന്നൂർ

രാഷ്ട്രീയ നേതാവിനേക്കാൾ തങ്ങൾക്ക് ചേരുന്ന ഭാവവും ശീലവും ഒരു മതനേതാവിന്റേതായിരുന്നു. രാത്രി എത്ര വൈകി വീട്ടിലെത്തിയാലും പ്രഭാത നിസ്‌കാരത്തിന് പള്ളിയിലെത്തുന്ന തങ്ങളുടെ മതനിഷ്ടജീവിതം അനുകരണീയമായിരുന്നു. മാസമുറപ്പിക്കൽ മുതൽ നൂലിൽ മന്ത്രിച്ചൂതി നടത്തുന്ന ആത്മീയ ചികിത്സവരെയുള്ള അനേകം ആവശ്യങ്ങൾക്കായി തങ്ങളെ തേടിയെത്തുന്ന ആത്മദാഹികളായ മനുഷ്യരുടെ അഭയമായിരുന്നു ആ ജീവിതം. കേരള മുസ്‌ലിമിന്റെ മതപരിസരത്തെ തീർപ്പും തീർപ്പു കൽപിക്കുന്ന സഭയുടെ ഉപാധ്യക്ഷനും തങ്ങൾ തന്നെയായിരുന്നു. നിരവധി മഹല്ലുകളുടെ ഖാസിയായിരുന്ന തങ്ങൾക്ക് അവരുടെ പ്രശ്‌നങ്ങൾക്ക് മതപരമായ പരിഹാരം നൽകാൻ കഴിയുന്ന ജ്ഞാനവുമുണ്ടായിരുന്നു.

എത്ര മതസ്ഥാപനങ്ങളുടെ ശിലാഫലകങ്ങളിലാണ് ഈ കുറിയ മനുഷ്യന്റെ വലിയ പേരുകൾ കൊത്തിവയ്ക്കപ്പെട്ടിരിക്കുന്നത്. അവരുടെ സാന്നിധ്യവും പ്രാർഥനയും ഒരു പുഞ്ചിരിപോലും തണലും ആശ്വാസമായി കരുതുന്ന വിശ്വാസികൾക്കാണ് ശരിക്കും തങ്ങളെ നഷ്ടമായത്.
2008ൽ സമസ്ത കേന്ദ്രമുശാവറാ അംഗമായി തെരഞ്ഞെടുക്കപ്പെട്ട തങ്ങളെ 2010 ഒക്ടോബർ രണ്ടിന് വൈസ് പ്രസിഡന്റായി തെരഞ്ഞെടുത്തു. 2009ലാണ് സുന്നി യുവജനസംഘം സംസ്ഥാന പ്രസിഡന്റായി തെരഞ്ഞെടുത്തത്. സുന്നി മഹല്ല് ഫെഡറേഷൻ സംസ്ഥാന പ്രസിഡന്റ്, സമസ്ത കേരള ഇ സ്‌ലാംമത വിദ്യാഭ്യാസ ബോർഡ് ട്രഷറർ തുടങ്ങിയ സ്ഥാനങ്ങളും വഹിച്ചു.

ശാരീരികമായി തങ്ങാൻ കഴിയാഞ്ഞിട്ടു പോലും നിരസിക്കാതെ എല്ലാം തങ്ങൾ തന്നെ ആരേയും മടക്കാതെ ഏറ്റെടുക്കുകയായിരുന്നു. എല്ലാവരേയും വിശ്വസിക്കാനായിരുന്നു തങ്ങൾക്കിഷ്ടം. കേരളത്തിലെ പ്രമുഖ സാമുദായിക സംഘടനയുടെ തലപ്പത്തിരുന്നിട്ടും പ്രൈവറ്റ് അസിസ്റ്റന്റുമാരെ നിയമിക്കാതെ എല്ലാം തങ്ങൾ സ്വയം ഏറ്റെടുക്കുകയാരുന്നു. അത്യാഢംബരങ്ങളോ അലങ്കാരങ്ങളെ ഇല്ലാത ലളിതമായ ജീവിതം തന്നെയായിരുന്നു ആ മനുഷ്യന്റെ കരുത്തും നന്മയും.