കല്‍പ്പറ്റ: ജില്ലാ സ്‌പോര്‍ട്‌സ് കൗണ്‍സിലിന്റെ നേതൃത്വത്തില്‍ നടത്തുന്ന ജില്ലാതല സിവില്‍ സര്‍വിസ് കായികമേള സെപ്തംബര്‍ ഒന്ന്, മൂന്ന് തിയ്യതികളിലായി ജില്ലയിലെ വിവിധ കേന്ദ്രങ്ങളില്‍ നടക്കും.
പുരുഷന്മാര്‍ക്കും വനിതകള്‍ക്കുമായി അത്‌ലറ്റിക്‌സ്, ഷട്ടില്‍ ബാഡ്മിന്റണ്‍, ടേബിള്‍ ടെന്നീസ്, നീന്തല്‍, ചെസ്സ് എന്നീ ഇനങ്ങളിലും പുരുഷന്മാര്‍ക്കു മാത്രമായി ഫുട്‌ബോള്‍, വോളിബോള്‍, ബാസ്‌കറ്റ്‌ബോള്‍, ക്രിക്കറ്റ്, പവര്‍ ലിഫ്റ്റിങ്, റെസ്‌ലിങ്, വെയ്റ്റ് ലിഫ്റ്റിങ് ആന്‍ഡ് ബെസ്റ്റ് ഫിസിക്, ലോണ്‍ ടെന്നീസ്, കബഡി എന്നീ ഇനങ്ങളിലുമായിരിക്കും മത്സരങ്ങള്‍ നടത്തുന്നത്. സര്‍ക്കാര്‍ സര്‍വിസില്‍ പ്രവേശിച്ച് ആറു മാസം കാലാവധി പൂര്‍ത്തിയാക്കിയ സ്ഥിരം ജീവനക്കാര്‍ക്ക് ജില്ലാതല സിവില്‍ സര്‍വിസ് കായിക മേളയില്‍ പങ്കെടുക്കാം.
സെപ്റ്റംബര്‍ ഒന്നിന് കല്‍പ്പറ്റ എസ്.കെ.എം.ജെ സ്‌കൂള്‍ ഗ്രൗണ്ടില്‍ ഫുട്‌ബോള്‍, ക്രിക്കറ്റ്, പവര്‍ ലിഫ്റ്റിങ്, ഗുസ്തി, വെയ്റ്റ് ലിഫ്റ്റിങ് ആന്‍ഡ് ബെസ്റ്റ് ഫിസിക്, കബഡി, ലോണ്‍ ടെന്നീസ് എന്നീ മത്സരങ്ങളും, മൂന്നിന് എസ്.കെ.എം.ജെ. ഹയര്‍ സെക്കന്‍ഡറി സ്‌കൂള്‍ ഗ്രൗണ്ടില്‍ അത്‌ലറ്റിക്‌സ്, വോളിബോള്‍, ബാസ്‌കറ്റ് ബോള്‍, ചെസ്, ഷട്ടില്‍ ബാറ്റ്മിന്റണ്‍ മത്സരങ്ങളും, ചെന്നലോട് ടേബിള്‍ ടെന്നീസ് ഇന്‍ഡോര്‍ സ്‌റ്റേഡിയത്തില്‍ വെച്ച് ടേബിള്‍ ടെന്നീസ് മത്സരങ്ങളും ബത്തേരി കടമാന്‍ ചിറയില്‍ വച്ച് നീന്തല്‍ മത്സരങ്ങളും നടത്തും.
പങ്കെടുക്കുവാന്‍ ആഗ്രഹിക്കുന്ന സര്‍ക്കാര്‍ ജീവനക്കാര്‍ ഓഫിസ് മേധാവി സാക്ഷ്യപ്പെടുത്തിയ എന്‍ട്രികള്‍ ഈ മാസം 29ന് വൈകിട്ട് നാലിന് മുന്‍പായി ജില്ലാ സ്‌പോര്‍ട്‌സ് കൗണ്‍സില്‍ ഓഫിസില്‍ നേരിട്ടോ, ഇ-മെയില്‍ വിലാസത്തിലോ എത്തിക്കേണ്ടതാണെന്ന് സെക്രട്ടറി അറിയിച്ചു. കൂടുതല്‍ വിവരങ്ങള്‍ക്ക് ഫോണ്‍: 04936-202658.