ഗൂഡല്ലൂര്‍: കാട്ടാന ശല്യം രൂക്ഷമായ കുന്നൂര്‍ മേഖലയില്‍ സ്‌കൂളുകള്‍ക്ക് അവധി നല്‍കി. ജനവാസ കേന്ദ്രങ്ങളിലിറങ്ങിയ കാട്ടാനക്കൂട്ടം പ്രദേശത്ത് തമ്പടിച്ചതോടെയാണ് അധികൃതര്‍ തൂതര്‍മട്ടം, കൊലകൊമ്പ മേഖലയിലെ ഗവ-സ്വകാര്യ സ്‌കൂളുകള്‍ക്ക് അവധി നല്‍കിയത്. തൂതര്‍മട്ടം ഗവ. സ്‌കൂള്‍ ഗെയ്റ്റ് കാട്ടാനക്കൂട്ടം തകര്‍ത്തിട്ടുണ്ട്. കൂടാതെ പ്രദേശത്ത് വന്‍ കൃഷിനാശവും വരുത്തിയിട്ടുണ്ട്. റെയ്ഞ്ചര്‍ രാമചന്ദ്രന്റെ നേതൃത്വത്തിലുള്ള വനപാലക സംഘം ആനകളെ നിരീക്ഷിച്ച് വരുന്നുണ്ട്. കാട്ടാനക്കൂട്ടത്തെ ഉള്‍വനത്തിലേക്ക് തുരത്തണമെന്നും വനാതിര്‍ത്തികളിലെ പ്രതിരോധ സംവിധാനങ്ങള്‍ കാര്യക്ഷമമാക്കണമെന്നും നാട്ടുകാര്‍ ആവശ്യപ്പെട്ടു.