പി.കെ മുഹമ്മദ് ഹാത്തിഫ്
കോഴിക്കോട്
സംസ്ഥാനത്ത് സ്വന്തമായി വാക്‌സിൻ നിർമാണ കേന്ദ്രം ആരംഭിക്കാൻ പ്രഖ്യാപിച്ച പത്തു കോടിയിൽ ചെലവഴിച്ചത് ആയിരം രൂപ മാത്രം. രണ്ടാം പിണറായി സർക്കാരിന്റെ ആദ്യ ബജറ്റിലെ പ്രധാന പ്രഖ്യാപനങ്ങളിലൊന്നായിരുന്നു ഇത്. സംസ്ഥാനത്തിന് സ്വന്തമായി വാക്‌സിൻ ഗവേഷണത്തിനും വാക്‌സിൻ നിർമാണ യൂനിറ്റ് ആരംഭിക്കാനുമാണ് ആദ്യ ബജറ്റിൽ പത്തു കോടി വകയിരുത്തിയത്.
എന്നാൽ ബജറ്റിൽ വകയിരുത്തിയ തുകയിൽനിന്ന് ഇതുവരെ ആയിരം രൂപ മാത്രമാണ് ചെലവഴിച്ചതെന്നാണ് ധനവകുപ്പിന്റെ കണക്കുകളിൽ പറയുന്നത്. നടപ്പു സാമ്പത്തിക വർഷത്തെ ആദ്യ ഉപധനാഭ്യർഥനയിൽ വാക്‌സിൻ നിർമാണ യൂനിറ്റ് ആരംഭിക്കാനായി തീരുമാനിച്ചിരുന്നു. ഇതിന്റെ ഭാഗമായി ടോക്കൺ പ്രൊവിഷനായാണ് ആയിരം രൂപ അനുവദിച്ചത്. മറ്റു തുകയൊന്നും പദ്ധതിക്കായി ചെലവഴിച്ചിട്ടില്ലെന്നാണ് വകുപ്പ് നൽകുന്ന വിശദീകരണം.

ശാസ്ത്ര സാങ്കേതിക പരിസ്ഥിതി കൗൺസിലിനു കീഴിൽ തിരുവനന്തപുരം തോന്നയ്ക്കലിലെ ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് വൈറോളജിയിലായിരുന്നു വാക്‌സിൻ ഗവേഷണ കേന്ദ്രം ആരംഭിക്കാൻ പദ്ധതിയിട്ടിരുന്നത്.

കൊവിഡ് വാക്‌സിൻ നിർമാണ മേഖലയിലേക്ക് കേരളം കടക്കുന്നതിന്റെ ആദ്യ സൂചനയായാണ് പ്രഖ്യാപനം നടത്തിയിരുന്നത്. കേന്ദ്രം ആരംഭിക്കുന്നതിന്റെ പ്രാഥമിക ഘട്ടമായാണ് ഇത്രയധികം തുക അനുവദിച്ചിരുന്നത്.

പ്രമുഖ കമ്പനികളുമായി ചർച്ചകൾ ആരംഭിക്കുന്നതിനും പെട്ടെന്നു തന്നെ വാക്‌സിൻ ഉൽപാദനം സാധ്യമാക്കുന്നതിനും ശാസ്ത്ര സാങ്കേതിക വകുപ്പ് പ്രിൻസിപ്പൽ സെക്രട്ടറി ചെയർമാനായ വർക്കിങ് ഗ്രൂപ്പിനെ ചുമതലപ്പെടുത്തുന്നതടക്കമുള്ള കാര്യങ്ങളും മുഖ്യമന്ത്രിയുടെ നേതൃത്വത്തിൽ ചർച്ച ചെയ്തിരുന്നു.
ഇതിനായി പ്രൊജക്ട് ഡയറക്ടറെ നിയമിക്കുന്നതടക്കമുള്ള കാര്യങ്ങളും മുഖ്യമന്ത്രിയുടെ നേരിട്ടുള്ള നിയന്ത്രണത്തിലായിരുന്നു നടന്നിരുന്നത്.
എന്നാൽ പിന്നീട് ഇതുമായി ബന്ധപ്പെട്ട ചർച്ചകളും കൂടിയാലോചനകളും നിലയ്ക്കുകയായിരുന്നു.