മലപ്പുറം
മലങ്കര ഓർത്തഡോക്‌സ് സഭയുടെ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാത്തോലിക്കാ ബാവാ പാണക്കാട് കൊടപ്പനക്കൽ തറവാട്ടിലെത്തി. മതസൗഹാർദത്തിനു വേണ്ടി എന്നും നിലകൊണ്ട മഹത് വ്യക്തിയായിരുന്നു വിടപറഞ്ഞ ഹൈദരലി ശിഹാബ് തങ്ങളെന്ന് പരിശുദ്ധ കാത്തോലിക്കാ ബാവ അനുസ്മരിച്ചു. മുസ് ലിം ലീഗ് പ്രസിഡന്റായി തിരഞ്ഞെടുക്കപ്പെട്ട സാദിഖലി ശിഹാബ് തങ്ങളെ അദ്ദേഹം അഭിനന്ദിച്ചു.

മലബാർ ഭദ്രാസന സഹായ മെത്രാപ്പൊലീത്ത എബ്രഹാം മാർ സെറാഫിം, കെയർ ആൻഡ് ഷെയർ മാനേജിങ് ഡയരക്ടറുമായ ഫാ. തോമസ് കുര്യൻ മരോട്ടിപ്പുഴ, മലബാർ ഭദ്രാസന സെക്രട്ടറി ഫാ. തോമസ് കുര്യൻ താഴെയിൽ എന്നിവരും കൂടെയുണ്ടായിരുന്നു. അബ്ബാസലി ശിഹാബ് തങ്ങൾ, ബഷീറലി ശിഹാബ് തങ്ങൾ, മുനവ്വറലി ശിഹാബ് തങ്ങൾ, നഈം അലി ശിഹാബ് തങ്ങൾ എന്നിവരുടെ നേതൃത്വത്തിലാണ് കത്തോലിക്ക ബാവയെ സ്വീകരിച്ചത്.