ആലത്തൂര്‍(പാലക്കാട്)
ക്ഷേത്രോത്സവത്തിനിടെയുണ്ടായ സംഘർഷത്തിൽ കുത്തേറ്റ യുവമോര്‍ച്ച പ്രവര്‍ത്തകന്‍ ചികിത്സയിലിരിക്കെ മരിച്ചു. പഴമ്പാലക്കോട് വടക്കേപാവടിയില്‍ സുബ്രഹ്മണ്യന്റെ മകനും യുവമോര്‍ച്ച പഞ്ചായത്ത് കമ്മിറ്റി സെക്രട്ടറിയുമായ അരുണ്‍കുമാര്‍ (28) ആണ് മരിച്ചത്. മാര്‍ച്ച് രണ്ടിന് വൈകുന്നേരം ആറിന് പഴമ്പാലക്കോട് മാരിയമ്മന്‍ ക്ഷേത്രത്തിലെ പൂജയോടനുബന്ധിച്ച് കുംഭം ഒഴുക്കാന്‍ ഗായത്രിപുഴയിലേക്ക് പോകുന്നതിനിടെ ഇരുവിഭാഗങ്ങള്‍ തമ്മില്‍ സംഘര്‍ഷം ഉണ്ടായിരുന്നു. പൊലിസ് ലാത്തിവീശി ഇവരെ ഓടിച്ചു. ഇതിനുശേഷം ഒരു സംഘം വടക്കേപാവടിയിലെ പി.എസ്.സി പഠന കേന്ദ്രം തകര്‍ത്തതോടെ ഇരുവിഭാഗങ്ങള്‍ അരുണ്‍കുമാറിന്റെ വീടിനടുത്തുള്ള ശ്രീകൃഷ്ണ ക്ഷേത്രത്തിനു സമീപം വീണ്ടും ഏറ്റുമുട്ടി.

അരുണ്‍കുമാറിനേയും കൂട്ടുകാരായ ഗോകുല്‍, കൃഷ്ണകുമാര്‍, കൃഷ്ണന്‍, സന്തോഷ്, വിഷ്ണു എന്നിവരെയും ഒരു സംഘം തടഞ്ഞു നിര്‍ത്തി ആക്രമിക്കുകയായിരുന്നു. ഇതിനിടെ അരുണ്‍കുമാറിന്റെ നെഞ്ചിൽ കുത്തേറ്റു. ചികിത്സയിലിരിക്കെ ഇന്നലെ വൈകിട്ട് അഞ്ചോടെ നെന്മാറയിലെ സ്വകാര്യ ആശുപത്രിയില്‍ വച്ചാണ് മരിച്ചത്. വടക്കഞ്ചേരിയിലെ ഇരുചക്രവാഹന ഷോറൂം ജീവനക്കാരനാണ്.
സംഭവത്തില്‍ ഏഴുപേര്‍ക്കെതിരേയാണ് പൊലിസ് കേസെടുത്തത്.ഇതില്‍ രണ്ടുപേരെ സംഭവ ദിവസം അറസ്റ്റുചെയ്തിരുന്നു. പഴമ്പാലക്കോട് വടക്കേപാവടി മണികണ്ഠന്‍ (56), മകന്‍ കൃഷ്ണദാസ് (23) എന്നിവരെയാണ് നേരത്തെ അറസ്റ്റ് ചെയതത്. വടക്കേപാവടി സ്വദേശികളായ ജയേഷ് (21), സന്തോഷ് (21), രമേഷ് (23), നിഥിന്‍ (22) എന്നിവരെ ഇന്നലെയാണ് അറസ്റ്റ് ചെയ്തത്. പ്രതികളെ കോടതി റിമാന്‍ഡ് ചെയ്തു. കേസില്‍ പ്രതിയായ ഡി.വൈ.എഫ്.ഐ. വടക്കേപാവടി യൂനിറ്റ് സെക്രട്ടറി മിഥുനെ പിടികൂടാനായിട്ടില്ലെന്ന് പൊലിസ് പറഞ്ഞു.

ഒരേസമുദായക്കാരും ബന്ധുക്കളുമായ ഇരുവിഭാഗങ്ങൾ തമ്മിലാണ് സംഘര്‍ഷം ഉണ്ടായതെന്നും ഇതില്‍ രാഷ്ട്രീയം ഇല്ലെന്നും എസ്.പി ആര്‍.വിശ്വനാഥ് പറഞ്ഞു. എന്നാൽ പ്രതികള്‍ സി.പി.എം,ഡി.വൈ.എഫ്.ഐ. പ്രവര്‍ത്തകരാണെന്ന് ബി.ജെ.പി അരോപിച്ചിട്ടുണ്ട്. ആലത്തൂര്‍ താലൂക്കില്‍ ഇന്ന് ഹര്‍ത്താലിനും ബി.ജെ.പി. ആഹ്വാനം ചെയ്തിട്ടുണ്ട്.പ്രതികള്‍ സി.പി.എം. പ്രവര്‍ത്തകരാണെന്നും മുഴുവന്‍ പ്രതികളേയും അറസ്റ്റ് ചെയ്യുന്നതില്‍ പൊലിസ് അലംഭാവം കാട്ടുന്നുവെന്നും ബി.ജെ.പി. കുറ്റപ്പെടുത്തി. അതിനിടെ സംഭവത്തില്‍ രാഷ്ട്രീയമില്ലെന്നും സി.പി.എമ്മിനോ ഡി.വൈ.എഫ്.ഐയ്‌ക്കോ ബന്ധമില്ലെന്നും സി.പി.എം വ്യക്തമാക്കി.