ന്യൂഡല്‍ഹി: 2008ലെ വിവാദമായ ബട്‌ലഹൗസ് ഏറ്റുമുട്ടലില്‍ ഡല്‍ഹി പൊലിസ് സ്‌പെഷല്‍ സെല്‍ ഉദ്യോഗസ്ഥന്‍ മോഹന്‍ചന്ദ് ശര്‍മ കൊല്ലപ്പെട്ട കേസില്‍ പ്രതിക്ക് വധശിക്ഷ. ഡല്‍ഹി ഹൈക്കോടതിയാണ് പ്രതി അരിസ് ഖാന് വധശിക്ഷ വിധിച്ചത്.
അപൂര്‍വങ്ങളില്‍ അപൂര്‍വമായ കേസാണിതെന്ന് ചൂണ്ടിക്കാട്ടിയാണ് അഡീഷണല്‍ സെഷന്‍സ് ജഡ്ജി സന്ദീപ് യാദവിന്റെ നടപടി. വ്യാജ ഏറ്റുമുട്ടലെന്ന് വ്യാപക ആരോപണമുയര്‍ന്ന സംഭവത്തില്‍ രണ്ടു പൊലിസുകാര്‍ക്ക് പരുക്കേറ്റിരുന്നു.
ഡല്‍ഹി, ഗുജറാത്ത്, രാജസ്ഥാന്‍, ഉത്തര്‍പ്രദേശ് എന്നിവിടങ്ങളില്‍ സ്‌ഫോടനം ആസൂത്രണം ചെയ്ത ഇന്ത്യന്‍ മുജാഹിദ്ദീന്‍ ഭീകരനാണ് അരിസെന്നാണ് ഡല്‍ഹി പൊലിസിന്റെ ആരോപണം. ഡല്‍ഹിയില്‍ സ്‌ഫോടനമുണ്ടായതിനു പിന്നാലെയാണ് ബട്‌ല ഹൗസില്‍ ഏറ്റുമുട്ടലുണ്ടായത്. ഡല്‍ഹി സ്‌ഫോടനമുള്‍പ്പെടെ ആറു കേസുകള്‍ കൂടി അരിസിനെതിരേയുണ്ട്. 2018 ഫെബ്രുവരിയിലാണ് ഉത്തര്‍പ്രദേശ് അസംഗഡ് സ്വദേശിയായ അരിസ് ഖാന്‍ പൊലിസ് പിടിയിലായത്. ഏറ്റുമുട്ടലിനുശേഷം അരിസ് ഖാന്‍ ബട്‌ല ഹൗസിലെ ഫ്‌ളാറ്റില്‍ നിന്ന് രക്ഷപ്പെടുകയായിരുന്നുവെന്നാണ് പൊലിസ് പറയുന്നത്.

പ്രതി ജീവിച്ചിരിക്കുന്നത് രാജ്യത്തിന്റെയും സമൂഹത്തിന്റെയും സുരക്ഷയ്ക്കും സമാധാനത്തിനും സഹവര്‍ത്തിത്വത്തിനും ഭീഷണിയാണെന്നും അതിനാല്‍ വധശിക്ഷ നല്‍കണമെന്നുമുള്ള പ്രോസിക്യൂഷന്‍ വാദം കോടതി അംഗീകരിക്കുകയായിരുന്നു. ഒരു നിയമപാലകനെ ഡ്യൂട്ടിക്കിടെ വെടിവച്ചു കൊല്ലുകയായിരുന്നു പ്രതിയെന്ന് അഡിഷണല്‍ പബ്ലിക് പ്രോസിക്യൂട്ടര്‍ എ.ടി അന്‍സാരി വാദിച്ചു. അരിസ് ഖാന്‍ കുറ്റക്കാരനാണെന്ന് നേരത്തെ കോടതി വിധിച്ചിരുന്നു. വധശിക്ഷ നല്‍കുന്നതിനെ അരിസ് ഖാന്റെ അഭിഭാഷകന്‍ എം.എസ് ഖാന്‍ എതിര്‍ത്തു.