ജിദ്ദ: കോട്ടക്കൽ മണ്ഡലം കെഎംസിസിയുടെ ആഭിമുഖ്യത്തിൽ ഈയിടെ വിട പറഞ്ഞ മുസ്‌ലിം ലീഗ് മുൻ സംസ്ഥാന പ്രസിഡന്റ്‌ പാണക്കാട് സയ്യിദ് ഹൈദരലി ശിഹാബ് തങ്ങൾ, മലപ്പുറം ജില്ല പഞ്ചായത്ത്‌ മെമ്പറും കോട്ടക്കൽ മണ്ഡലം മുസ്‌ലിം ലീഗ് മുൻ വൈസ് പ്രസിഡന്റുമായിരുന്ന മൂർക്കത്ത് ഹംസ മാസ്റ്റർ എന്നിവരുടെ അനുസ്മരണം സംഘടിപ്പിച്ചു. ബാഗ്ദാദിയ്യ ഇമ്പീരിയൽ റെസ്റ്റോറന്റ് ഹാളിൽ വെച്ച് നടന്ന പരിപാടി ജിദ്ദ കെഎംസിസി സെൻട്രൽ കമ്മിറ്റി ജനറൽ സെക്രട്ടറി അബൂബക്കർ അരിമ്പ്ര ഉദ്ഘാടനം ചെയ്തു.

കേരളത്തിലെ മുസ്‌ലിംകളുടെ മത - രാഷ്ട്രീയ മുന്നേറ്റത്തിൽ പാണക്കാട് സയ്യിദ് കുടുംബം വഹിച്ച പങ്ക് വളരെ വലുതാണെന്ന് അദ്ദേഹം പറഞ്ഞു. ഇന്ത്യ പോലുള്ള ഒരു ബഹുസ്വര സമൂഹത്തിൽ ഇസ്‌ലാമിക ആദർശം ഉൾക്കൊണ്ട് എങ്ങനെ ജീവിക്കാം എന്നതിന്റെ ഉത്തമ മാതൃകയായിരുന്നു സയ്യിദ് ഹൈദരലി തങ്ങൾ എന്നും അദ്ദേഹം പറഞ്ഞു. കേരളത്തിൽ പോലും വർഗീയ ശക്തികൾ പ്രവർത്തനം സജീവമാക്കുന്ന സാഹചര്യത്തിൽ മത സൗഹാർദ്ദതത്തിന് ഏറെ സംഭാവന നൽകിയ ഹൈദരലി തങ്ങളുടെ നിര്യാണം രാജ്യത്തിനു തന്നെ വലിയ നഷ്ടമാണെന്നും അദ്ദേഹം കൂട്ടിച്ചേർത്തു. പരിപാടിയിൽ കോട്ടക്കൽ മണ്ഡലം കെഎംസിസി വൈസ് പ്രസിഡന്റ്‌ മുഹമ്മദ്‌ കല്ലിങ്ങൽ അധ്യക്ഷത വഹിച്ചു.

സഊദി കെഎംസിസി നാഷണൽ കമ്മിറ്റി അംഗം നാസർ വെളിയങ്കോട്, കെഎംസിസി സെൻട്രൽ കമ്മിറ്റി ഭാരവാഹികളായ വി. പി മുസ്തഫ, സി. കെ റസാഖ്‌ മാസ്റ്റർ, മലപ്പുറം ജില്ല കെഎംസിസി ഭാരവാഹികളായ സീതി കോളകാടൻ, ഹബീബ് കല്ലൻ, വി. പി ഉനൈസ് തിരൂർ, സാബിൽ മമ്പാട്, അബ്ബാസ് വേങ്ങൂർ, കെഎംസിസി വെൽഫെയർ വിംഗ് കൺവീനർ മുഹമ്മദ്‌ കുട്ടി പാണ്ടിക്കാട്, മെഡിക്കൽ വിംഗ് ചെയർമാൻ മാനു പട്ടിക്കാട്, ശറഫുദ്ധീൻ പന്തൊടി തുടങ്ങിയവർ പ്രസംഗിച്ചു.

നാസർ കാടാമ്പുഴ മൂർക്കത്ത് ഹംസ മാസ്റ്റർ അനുസ്മരണം നടത്തി. ജില്ല പഞ്ചായത്ത്‌ മെമ്പർ എന്ന നിലയിൽ മികച്ച പ്രവർത്തനം കാഴ്ച വെച്ച ഹംസ മാസ്റ്റർ മാറാക്കര പഞ്ചായത്തിൽ രാഷ്ട്രീയ സാമൂഹ്യ രംഗത്ത് നിറഞ്ഞു നിന്ന വ്യക്തിത്വം ആയിരുന്നുവെന്ന് അദ്ദേഹം പറഞ്ഞു. മുഹമ്മദലി മുസ്‌ലിയാർ കാപ്പ് മയ്യിത്ത് നിസ്ക്കാരത്തിനും പ്രാർത്ഥനക്കും നേതൃത്വം നൽകി.

കോട്ടക്കൽ മണ്ഡലം കെഎംസിസി ജനറൽ സെക്രട്ടറി നാണി ഇസ്ഹാഖ് മാസ്റ്റർ സ്വാഗതവും സെക്രട്ടറി റസാഖ്‌ വെണ്ടല്ലൂർ നന്ദിയും പറഞ്ഞു. മണ്ഡലം കെഎംസിസി ഭാരവാഹികളായ ടി. കെ അൻവർ സാദത്ത് കുറ്റിപ്പുറം, ടി. ടി ഷാജഹാൻ പൊന്മള, സൈനു കോടഞ്ചേരി, കുഞ്ഞാലി കുമ്മാളിൽ, കെ. വി മുസ്തഫ വളാഞ്ചേരി തുടങ്ങിയവർ പരിപാടിക്ക് നേതൃത്വം നൽകി.