ന്യുഡല്‍ഹി: നിയമസഭാ തിരഞ്ഞെടുപ്പില്‍ ശേഷിക്കുന്ന മണ്ഡലങ്ങളിലേക്കുള്ള സ്ഥാനാര്‍ഥികളെക്കൂടി കോണ്‍ഗ്രസ് പ്രഖ്യാപിച്ചു. സ്ഥാനാര്‍ഥി നിര്‍ണയത്തില്‍ തര്‍ക്കം തുടര്‍ന്നിരുന്ന ആറു സീറ്റിലേക്കുകൂടിയാണ് സ്ഥാനാര്‍ഥികളെ ഹൈക്കമാന്‍ഡ് പ്രഖ്യാപിച്ചത്.

വട്ടിയൂര്‍ക്കാവില്‍ വീണ എസ്.നായര്‍ മത്സരിക്കും. കൊല്ലം ജില്ലയിലെ കുണ്ടറയില്‍ മന്ത്രി മേഴ്‌സിക്കുട്ടിയമ്മക്കെതിരേ പി.സി. വിഷ്ണുനാഥാണ് മത്സരിക്കുക. മലപ്പുറം തവനൂരില്‍ ഫിറോസ് കുന്നംപറമ്പില്‍, പട്ടാമ്പിയില്‍ റിയാസ് മുക്കോളി, കല്‍പ്പറ്റയില്‍ ടി.സിദ്ധീഖ് എന്നിവരാണ് മത്സരിക്കുക.

തവനൂരില്‍ മന്ത്രി കെ.ടി ജലീലിനെതിരേയാണ് ഫിറോസ് കുന്നംപറമ്പില്‍ രംഗത്തിറങ്ങുന്നത്. നിലമ്പൂരില്‍ വി.വി പ്രകാശ് സ്ഥാനാര്‍ഥിയാകും.
വട്ടിയൂര്‍ക്കാവില്‍ വനിതാ സ്ഥാനാര്‍ഥിയെ പരിഗണിച്ചതോടെ വനിതാപ്രാധിനിധ്യത്തിന് ചെറിയ രീതിയില്‍ പരിഹാരമായേക്കാമെന്നാണ് കോണ്‍ഗ്രസ് കണക്കുകൂട്ടല്‍. അതേ സമയം കല്‍പ്പറ്റയില്‍ ടി.സിദ്ധീഖിനെതിരേ കടുത്ത വിമര്‍ശനമുണ്ടായിരുന്നുവെങ്കിലും രാഹുല്‍ ഗാന്ധിയുടെ ഇടപെടലാണ് സിദ്ധീഖിന് നറുക്കുവീണത്. അതേ സമയം ധര്‍മ്മടത്ത് മുഖ്യമന്ത്രിക്കെതിരേ സ്ഥാനാര്‍ഥികളെ ഇപ്പോഴും കോണ്‍ഗ്രസ് പ്രഖ്യാപിച്ചിട്ടില്ല.