കീവ്: റഷ്യന്‍ അധിനിവേശത്തിനെതിരേ വിജയം വരെ ഉക്രൈന്‍ പോരാടുമെന്ന് പ്രസിഡന്റ് വ്‌ളോഡിമിര്‍ സെലെന്‍സ്‌കി. ചെറുത്തുനില്‍പ്പില്‍ പങ്കാളികളായ മുഴുവനാളുകളേയും അഭിവാദ്യം ചെയ്യുന്നതായും പുതുവത്സരദിനത്തില്‍ നടത്തിയ വൈകാരിക പ്രസംഗത്തില്‍ സെലെന്‍സ്‌കി പറഞ്ഞു.

യുദ്ധത്തിന്റെ ആദ്യ നാളുകള്‍ മുതല്‍ നമ്മുടെ സൈനികര്‍ എങ്ങനെയാണ് ഈ ലോകത്തിലെ വലിയ രണ്ടാം സൈന്യത്തെ തകര്‍ത്തതെന്ന് ഓര്‍ക്കണം. ഉക്രൈനിയക്കാരേ, നിങ്ങള്‍ അവിശ്വസനീയമാണ്. നമ്മള്‍ എന്താണ് ചെയ്തതെന്നും എന്താണ് ചെയ്തുകൊണ്ടിരിക്കുന്നതെന്നും നോക്കൂ! നമ്മുടെ ആളുകള്‍ അവരുടെ ഉപകരണങ്ങളും കാലാള്‍പ്പട നിരകളും തടഞ്ഞുനിര്‍ത്തിയതെങ്ങനെ. ഒരു വലിയ യുദ്ധത്തില്‍ ചെറിയ കാര്യങ്ങളില്ല- സെലെന്‍സ്‌കി പറഞ്ഞു.

നമ്മള്‍ ഓരോരുത്തരും പോരാളികളാണ്. നമ്മള്‍ ഓരോരുത്തരും ഓരോ മുന്നണിയാണ്. നമ്മള്‍ ഓരോരുത്തരുമാണ് പ്രതിരോധത്തിന്റെ അടിസ്ഥാനം. നമ്മള്‍ ഒരു ടീമായി പോരാടുന്നു. ഞാന്‍ നിങ്ങളെ എല്ലാവരെയും അഭിനന്ദിക്കുന്നു. ഉക്രൈനിലെ എല്ലാ അജയ്യമായ പ്രദേശങ്ങള്‍ക്കും നന്ദി പറയാന്‍ ഞാന്‍ ആഗ്രഹിക്കുന്നു-സെലെന്‍സ്‌കി കൂട്ടിച്ചേര്‍ത്തു.

പ്രസംഗത്തിന്റെ തൊട്ടുമുമ്പും റഷ്യ ശക്തമായ മിസൈല്‍ ആക്രമണം നടത്തിയിരുന്നു. കീവിലെ നിരവധി സ്ഥലങ്ങളില്‍ ഷെല്ലുകള്‍ പതിച്ചു. ശനിയാഴ്ച ഉച്ചയ്ക്ക് ശേഷം കീവില്‍ ചുരുങ്ങിയത് 11 സ്‌ഫോടനങ്ങളുണ്ടായതെന്ന് എ.എഫ്.പി റിപ്പോര്‍ട്ട് ചെയ്തു.