ന്യൂഡല്‍ഹി: നരേന്ദ്ര മോദി സര്‍ക്കാരിന്റെ നോട്ടുനിരോധന തീരുമാനം ചോദ്യം ചെയ്യുന്ന 58 ഹരജികളില്‍ സുപ്രിം കോടതി വിധിപ്രസ്താവം തുടങ്ങി. ജസ്റ്റിസ് ബി.ആര്‍.ഗവായ് ആണ് ആദ്യം വിധി പറഞ്ഞത്. സര്‍ക്കാര്‍ മുന്നോട്ടുവച്ച ലക്ഷ്യങ്ങള്‍ കൈവരിച്ചോ ഇല്ലയോ എന്നതു പ്രസക്തമല്ല. നോട്ടുനിരോധനത്തിന്റെ മൂന്നു ലക്ഷ്യങ്ങളും ശരിയാണെന്നും ജസ്റ്റിസ് ഗവായ് പറഞ്ഞു. തീരുമാനിച്ചത് കേന്ദ്രമായതു കൊണ്ടു മാത്രം നടപടി തെറ്റാണെന്ന് പറയാനാവില്ലെന്ന് പറഞ്ഞ അദ്ദേഹം നോട്ടു നിരോധനം റദ്ദാക്കാനാവില്ലെന്നും അദ്ദേഹം കൂട്ടിച്ചേര്‍ത്തു.

ലക്ഷ്യം നേടിയോ ഇല്ലയോ എന്നതോ പരിഗണിക്കേണ്ട. ആര്‍.ബി.ഐയുമായി കൂടിയാലോചിച്ച് സര്‍ക്കാറിന് തീരുമാനമെടുക്കാം. ആര്‍.ബി.ഐ നിയമപ്രകാരം അസാധുവാക്കാം. എന്നാല്‍ നോട്ടു നിരോധനം റദ്ദാക്കാനാവില്ല- ജസ്റ്റിസ് ഗവായ് ചൂണ്ടിക്കാട്ടി.

അതേസമയം, ഇതിനോട് വിയോജിക്കുന്ന രീതിയിലാണ് ജസ്റ്റിസ് നാഗരത്‌നയുടെ നിരീക്ഷണം. നോട്ട് നിരോധിക്കണമെങ്കില്‍ നിയമ നടത്തണമായിരുന്നു എന്ന് അദ്ദേഹം ചൂണ്ടിക്കാട്ടി. ആ.ബി.ഐ ഡയരക്ടര്‍ ബോര്‍ഡ് വേണമായിരുന്നുനിര്‍ദ്ദേശം മുന്നോട്ടു വെക്കുന്നതെന്നും അദ്ദേഹം കൂട്ടിച്ചേര്‍ത്തു.

വാദംകേട്ട ഭരണഘടനാ ബെഞ്ചിന്റെ അധ്യക്ഷന്‍ ജസ്റ്റിസ് എസ്.അബ്ദുല്‍ നസീര്‍ 4നു വിരമിക്കുന്ന സാഹചര്യത്തിലാണ് ഇന്നു വിധി പറയുന്നത്. കഴിഞ്ഞ മാസം 7നാണു വാദം പൂര്‍ത്തിയാക്കി വിധി പറയാന്‍ മാറ്റിയത്.

ഇന്നത്തെ കേസ് ലിസ്റ്റ് പ്രകാരം, ഈ ഹര്‍ജികളില്‍ 2 വിധിന്യായങ്ങളുണ്ടാകും. ഭൂരിപക്ഷാഭിപ്രായത്തോടു യോജിച്ചാണോ വിയോജിച്ചാണോ പ്രത്യേക വിധിന്യായമെന്നതു വ്യക്തമല്ല. ഹര്‍ജികളില്‍ വിശദമായ വാദം കേട്ട കോടതി, നോട്ടുനിരോധിക്കാനുള്ള തീരുമാനവുമായി ബന്ധപ്പെട്ട രേഖകള്‍ ഹാജരാക്കാന്‍ കേന്ദ്ര സര്‍ക്കാരിനും റിസര്‍വ് ബാങ്ക് ഓഫ് ഇന്ത്യയ്ക്കും നിര്‍ദേശം നല്‍കിയിരുന്നു. കേന്ദ്ര സര്‍ക്കാര്‍ രഹസ്യരേഖയായാണു ഫയലുകള്‍ നല്‍കിയത്.

നോട്ടുനിരോധന തീരുമാനം സാമ്പത്തിക നയവുമായി ബന്ധപ്പെട്ടത് എന്നതുകൊണ്ടു മാത്രം ഇക്കാര്യത്തില്‍ കാഴ്ചക്കാരനാകാന്‍ കഴിയില്ലെന്നു വാദം കേള്‍ക്കലിനിടെ ബെഞ്ച് അഭിപ്രായപ്പെട്ടിരുന്നു. 2016ലെ നോട്ടുനിരോധന തീരുമാനം ഇപ്പോള്‍ കോടതി പരിശോധിക്കുന്നതിനോടു ശക്തമായ വിയോജിപ്പാണ് സര്‍ക്കാര്‍ ഉയര്‍ത്തിയത്. ഗുരുതര പിഴവുകളാണു സര്‍ക്കാരിനു സംഭവിച്ചതെന്നു ഹര്‍ജിക്കാര്‍ക്കു വേണ്ടി അഭിഭാഷകനും മുന്‍ ധനമന്ത്രിയുമായ പി.ചിദംബരം ചൂണ്ടിക്കാട്ടിയിരുന്നു.