അൻസാർ മുഹമ്മദ്
തിരുവനന്തപുരം
വിൽപനയ്ക്ക് വച്ചിരിക്കുന്ന കേന്ദ്ര പൊതുമേഖലാ സ്ഥാപനങ്ങൾ ലേലത്തിൽ എടുക്കാൻ പിന്നാലെ ഓടുന്ന സർക്കാരിന് സംസ്ഥാനത്തെ പൊതുമഖേലാ സ്ഥാപനങ്ങളുടെ നഷ്ടത്തിൽ മിണ്ടാട്ടമില്ല. കഴിഞ്ഞ വർഷം സംസ്ഥാന സർക്കാരിന്റെ ഉടമസ്ഥതയിലുള്ള പൊതുമേഖലാ സ്ഥാപനങ്ങളുടെ നഷ്ടം 250 ശതമാനം വർധിച്ചുവെന്നാണ് ബജറ്റിനൊപ്പം അവതരിപ്പിച്ച സാമ്പത്തിക അവലോകനം സൂചിപ്പിക്കുന്നത്.

സംസ്ഥാനത്തെ പൊതുമേഖലാ സ്ഥാപനങ്ങൾ വരുത്തിയ നഷ്ടം 1,738.25 കോടി രൂപയിൽനിന്ന് 6,055.47 കോടി രൂപയായി വർധിച്ചു. 248.37 ശതമാനമാണ് വർധിച്ചത്. ഈ സംരംഭങ്ങളിലെ നിക്ഷേപത്തിൽ 10.05 ശതമാനം വർധനവും കഴിഞ്ഞ വർഷത്തെ 7,066.11 കോടി രൂപയുടെ ബജറ്റ് പിന്തുണയും ഉണ്ടായിട്ടും നഷ്ടത്തിൽ കൂപ്പുകുത്തിയെന്നും റിപ്പോർട്ടിൽ പറയുന്നു. 153 പൊതുമേഖലാ സ്ഥാപനങ്ങളിൽ 116 എണ്ണം മാത്രമാണ് റിപ്പോർട്ടിന്റെ പരിധിയിൽ വന്നത്. സജീവ സംരംഭങ്ങളുടെ മൊത്തം പെയ്ഡ്അപ്പ് മൂലധനം 18,355.99 കോടി രൂപയാണ്. എന്റർപ്രൈസസിന്റെ ആസ്തി 11,630.01 കോടി രൂപയായി കുറഞ്ഞു. മുൻ വർഷത്തെ അപേക്ഷിച്ച് 43.23 ശതമാനം.

വ്യവസായ വകുപ്പിനു കീഴിലെ പൊതുമേഖലാ സ്ഥാപനങ്ങളായ തിരുവിതാംകൂർ കൊച്ചി കെമിക്കൽസ് ലിമിറ്റഡ് (ടി.സി.സി), കേരള സ്റ്റേറ്റ് ഡ്രഗ്‌സ് ആൻഡ് ഫാർമസ്യൂട്ടിക്കൽസ് ലിമിറ്റഡ്, കേരള സ്റ്റേറ്റ് ഇലക്ട്രോണിക് ഡവലപ്‌മെന്റ് കോർപറേഷൻ, മലബാർ സിമന്റ്‌സ് എന്നിവ 2019-20ൽ 152.98 കോടിയും 2020-21ൽ 137.62 കോടിയും നഷ്ടം രേഖപ്പെടുത്തി.
ലാഭമുണ്ടാക്കുന്ന സംരംഭങ്ങളുടെ എണ്ണം മുൻ സാമ്പത്തിക വർഷം 50 ആയിരുന്നു. എന്നാൽ, അവർ നേടിയ മൊത്തം ലാഭം 41.86 ശതമാനം കുറഞ്ഞു. 2019-20ലെ 883.73 കോടി രൂപയിൽനിന്ന് 2020-21ൽ 513.79 കോടി രൂപയായി. ഈ വർഷത്തെ ഏറ്റവും ലാഭകരമായ സംരംഭം കേരള സ്റ്റേറ്റ് ഫിനാൻഷ്യൽ എന്റർപ്രൈസസ് (146.41 കോടി രൂപ), കേരള മിനറൽസ് ആൻഡ് മെറ്റൽസ് ലിമിറ്റഡ് (85.28 കോടി രൂപ), കേരള ഫീഡ്‌സ് ലിമിറ്റഡ് (36.07 കോടി രൂപ) എന്നിവയാണ്.

നഷ്ടത്തിലായ സംരംഭങ്ങളിൽ കേരള സ്റ്റേറ്റ് റോഡ് ട്രാൻസ്‌പോർട്ട് കോർപറേഷനാണ് ഏറ്റവും കൂടുതൽ നഷ്ടം നേരിട്ടത് (1,976.03 കോടി രൂപ). തൊട്ടുപിന്നിൽ കേരള സ്റ്റേറ്റ് ഇലക്ട്രിസിറ്റി ബോർഡ് ലിമിറ്റഡ് (1,822.35 കോടി രൂപ), കേരള സ്റ്റേറ്റ് ബിവറേജസ് കോർപറേഷൻ (ബെവ്‌കോ) 1,608.17 കോടി രൂപ. മുൻ സാമ്പത്തിക വർഷം 180.84 കോടി രൂപ ലാഭം നേടിയ ബെവ്‌കോയുടെ ലാഭം കുറയാൻ കാരണമായി ചൂണ്ടിക്കാണിക്കുന്നത് കൊവിഡ് മൂലമുള്ള ലോക്ക്ഡൗണും മറ്റു നിയന്ത്രണങ്ങളുമാണ്. ലാഭകരമായ രണ്ടാമത്തെ പൊതുമേഖലാ സ്ഥാപനമായിരുന്നു ഇത്.
2020-21, 2019-20 വർഷങ്ങളിൽ ബെവ്‌കോയുടെ വിറ്റുവരവ് യഥാക്രമം 2,527.69 കോടി രൂപയും 3,782.51 കോടി രൂപയുമാണ്.
ഖജനാവിലേക്ക് ഏറ്റവും കൂടുതൽ സംഭാവന നൽകിയത് കോർപറേഷനായിരുന്നു ബെവ്‌കോ. നഷ്ടം കുറയ്ക്കാൻ പൊതുമേഖലാ സ്ഥാപനങ്ങളിൽ സർക്കാരിന്റെ അതീവ ശ്രദ്ധവേണമെന്നും സാമ്പത്തിക അവലോകനം ചൂണ്ടിക്കാട്ടുന്നു.