തിരുവനന്തപുരം
സിൽവർലൈൻ കടക്കെണിയാണെന്ന വാദം വികസനമുന്നേറ്റത്തെ തുരങ്കം വയ്ക്കുകയെന്ന ഉദ്ദേശത്തോടെയെന്ന് മുഖ്യമന്ത്രി പിണറായി വിജയൻ. പദ്ധതി ആരും രഹസ്യമായി കൊണ്ടുവന്നതല്ലെന്നും അദ്ദേഹം പറഞ്ഞു. പ്രതിപക്ഷത്തിന്റെ അടിയന്തരപ്രമേയ ചർച്ചയ്ക്ക് നിയമസഭയിൽ മറുപടി പറയുകയായിരുന്നു മുഖ്യമന്ത്രി. സിൽവർലൈൻ പദ്ധതിക്കായി എടുക്കുന്ന വായ്പയുടെ തിരിച്ചടവിന് 40 വർഷം വരെ സമയമുണ്ട്. 40 വർഷം കൊണ്ട് സമ്പദ്ഘടന മുന്നോട്ടുപോകും. ഇത് മനസിലാക്കാതെയാണ് പ്രതിപക്ഷം വിമർശനം ഉയർത്തുന്നത്. വിദേശനാണ്യ നിരക്കിൽ രണ്ടു മുതൽ 1.5 ശതമാനം വരെയാണ് വായ്പയുടെ പലിശ. പദ്ധതിയുടെ ആകെ ചെലവ് 64,000 കോടി രൂപയാണ്. 9,930 കെട്ടിടങ്ങളെയാണ് ബാധിക്കുന്നത്. സ്ഥലമേറ്റെടുപ്പിന് ഒരു ഹെക്ടറിന് ഒൻപതു കോടിയാണ് നഷ്ടപരിഹാരം കണക്കാക്കിയിരിക്കുന്നത്. സിൽവർലൈൻ നടപ്പാക്കാൻ റവന്യൂ വരുമാനത്തിലൂടെ കഴിയില്ല. വലിയ പദ്ധതികൾക്കായി വായ്പയെടുക്കുന്നത് സാധാരണരീതിയാണ്. സ്‌പെഷൽ പർപ്പസ് വെഹിക്കിൾ വഴിയാണു പദ്ധതിക്കായി കടമെടുക്കുന്നത്. അതിനു സർക്കാർ ഗ്യാരന്റി നൽകുന്നുണ്ട്. പൊതുവായ ആവശ്യത്തിനൊപ്പം പ്രതിപക്ഷം നിൽക്കുന്നില്ല. ഗെയിൽ പൈപ്പ് ബോംബെന്ന് പറഞ്ഞു. കിഫ്ബി വന്നപ്പോൾ എവിടെനിന്ന് പണമെന്ന് ചോദിച്ചു. എതിർപ്പുകൊണ്ട് വികസനപദ്ധതികൾ നടപ്പാക്കാതിരിക്കില്ല. പ്രതിപക്ഷം ഉന്നയിക്കുന്ന വിഷയങ്ങൾ പരിശോധിക്കും എന്നാൽ, പൂർണമായും എതിർത്താൽ അംഗീകരിക്കാൻ കഴിയില്ല.
കേരളത്തിൽ വാഹനങ്ങളുടെ എണ്ണം മറ്റിടങ്ങളേക്കാൾ കൂടുതലാണ്. 1,000 പേർക്ക് 445 വാഹനങ്ങൾ കേരളത്തിലുണ്ട്. സിൽവർലൈന് പകരം റോഡ് വികസിപ്പിച്ചാൽ നിരവധി റോഡുകൾ വേണ്ടിവരുമെന്നും മുഖ്യമന്ത്രി പറഞ്ഞു.