ന്യൂഡൽഹി
രാജ്യത്ത് 2014 മുതൽ 2021 വരെ ഐ.ടി നിയമമനുസരിച്ച് 25,638 സമൂഹമാധ്യമ അക്കൗണ്ടുകളും വെബ്സൈറ്റുകളും നിരോധിച്ചു. ലോക്സഭയിൽ കേന്ദ്ര വാർത്താ വിനിമയ വകുപ്പ് മന്ത്രി അനുരാഗ് താക്കൂർ ടി.എൻ പ്രതാപൻ എം.പിയുടെ ചോദ്യത്തിനുള്ള മറുപടിയിലാണ് ഇക്കാര്യമറിയിച്ചത്. യു.ആർ എല്ലുകൾ, വെബ്സൈറ്റുകൾ, വെബ് പേജുകൾ, സമൂഹമാധ്യമ അക്കൗണ്ടുകൾ തുടങ്ങിയവയാണ് ഉള്ളടക്കത്തിൽ പ്രശ്‌നങ്ങൾ ചൂണ്ടിക്കാട്ടി നിരോധിച്ചത്.

56 യൂട്യൂബ് ചാനലുകളും നിരോധിച്ചു. കേബിൾ ടെലിവിഷൻ നെറ്റ് വർക്ക് റെഗുലേഷൻ നിയമ പ്രകാരമുള്ള നിർദേശങ്ങൾ അനുസരിച്ചു മാത്രമേ ഇന്ത്യയിൽ ടി.വി ചാനലുകൾക്ക് പ്രവർത്തിക്കാൻ അനുമതിയുള്ളൂ. ഇതിനെതിരാണെന്ന് കണ്ടെത്തുമ്പോൾ ടി.വി ചാനലുകൾക്ക് നേരേ നടപടിയുണ്ടാകുമെന്നും മന്ത്രി പറഞ്ഞു.