കൊച്ചി: നാല് മണ്ഡലങ്ങളില്‍ ബി.ജെ.പിക്ക് സ്ഥാനാര്‍ഥികളെ ആവശ്യമുണ്ട്. ആവശ്യമായ പരസ്യ പ്രചാരണങ്ങളൊക്കെ കൊടുക്കുന്നുണ്ടെങ്കിലും ആരെയും അങ്ങ് ഒത്തുവന്നിട്ടില്ല. തെരഞ്ഞെടുപ്പ് രംഗം ചൂടുപിടിക്കുമ്പോഴും നാല് മണ്ഡലങ്ങളിലാണ് സ്ഥാനാര്‍ഥികളെ പ്രഖ്യാപിക്കാന്‍ കഴിയാതെ എന്‍.ഡി.എ മുന്നണി വിയര്‍ക്കുന്നത്.

മുന്നണിയിലെ മുഖ്യപാര്‍ട്ടിയായ ബി.ജെ.പിയാണ് എറണാകുളം, ആലത്തൂര്‍, കൊല്ലം, വയനാട് മണ്ഡലങ്ങളിലെ സ്ഥാനാര്‍ഥികളെ പ്രഖ്യാപിക്കാതെ നെട്ടോട്ടമോടുന്നത്. മറ്റുപാര്‍ട്ടികളില്‍നിന്നുള്ള പ്രമുഖരെ ചൂണ്ടയിട്ടാണ് കാത്തിരിപ്പ്. ഇവര്‍ ബി.ജെ.പിയിലേക്ക് എത്തുമെന്നും ഇവര്‍ക്കായാണ് സീറ്റുകള്‍ ഒഴിച്ചിട്ടിരിക്കുന്നതെന്നും ഇതിനോടകം ആക്ഷേപം ഉയര്‍ന്നിട്ടുണ്ട്. പാര്‍ട്ടിക്കുള്ളില്‍ തന്നെ മുറുമുറുപ്പും ഉയര്‍ന്നിട്ടുണ്ട്.

ദീര്‍ഘകാലമായി പാര്‍ട്ടിക്കായി പ്രവര്‍ത്തിക്കുന്നവരെ തഴഞ്ഞ് സ്ഥാനമോഹികള്‍ക്കായി സീറ്റ് മാറ്റിവയ്ക്കുന്നതിലും നേതാക്കള്‍ക്കും അണികള്‍ക്കുമിടയില്‍ പരാതിയുണ്ട്. തെരഞ്ഞെടുപ്പ് പ്രഖ്യാപനത്തിനുമുമ്പേ സ്ഥാനാര്‍ഥി നിര്‍ണയം പൂര്‍ത്തിയാക്കാനായിരുന്നു പാര്‍ട്ടി തീരുമാനം.

യുവനിരയിലെ പുതുമുഖങ്ങളെ അണിനിരത്താനും ലക്ഷ്യമിട്ടിരുന്നു. എറണാകുളത്ത് ചാനല്‍ അവതാരകയുടെ പേര് സജീവ ചര്‍ച്ചയിലുണ്ടായിരുന്നു. എന്നാല്‍ പത്മജ വേണുഗോപാല്‍ പാര്‍ട്ടിയിലെത്തിയതോടെ കൂടുതല്‍ പേര്‍ ഉടന്‍ പാര്‍ട്ടിയിലെത്തുമെന്നും സംസ്ഥാന നേതാക്കള്‍ ഉള്‍പ്പെടെയുള്ളവര്‍ പ്രഖ്യാപനം നടത്തി.

പത്മജയും പൊതുപരിപാടികളില്‍ ഇത് ആവര്‍ത്തിച്ചു. എന്നാല്‍ ദിവസങ്ങള്‍ പിന്നിട്ടിട്ടും സ്ഥാനാര്‍ഥി ആരെന്ന് പറയാതെ പ്രചാരണം നടത്തുന്നതിലുള്ള അസ്വസ്ഥതയും അണികള്‍ പ്രകടിപ്പിക്കുന്നുണ്ട്. അതേസമയം ഇനിയും ആരെയും കാത്തിരിക്കാതെ ഉടനെ സ്ഥാനാര്‍ഥികളെ പ്രഖ്യാപിക്കണമെന്നാണ് ഒരു വിഭാഗത്തിന്റെ ആവശ്യം.

അതേസമയം കേന്ദ്രനേതൃത്വത്തിന്റെ ശക്തമായ ഇടപെടലുകളിലൂടെ സ്ഥാനാര്‍ഥികളെ കെട്ടിയിറക്കുമ്പോള്‍ മുന്‍ തെരഞ്ഞെടുപ്പിനുനേടിയ വോട്ടുപോലും പെട്ടിയിലാക്കാന്‍ കഴിയില്ലേ എന്ന ആശങ്കയിലാണ് പ്രവര്‍ത്തകര്‍..