ന്യൂഡല്‍ഹി: ന്യൂനപക്ഷങ്ങള്‍ പ്രശ്‌നങ്ങള്‍ ഉയര്‍ത്തിക്കാട്ടുമ്പോള്‍ ശ്രദ്ധിക്കണമെന്നും ബി.ജെ.പിക്ക് ധ്രുവീകരണത്തിന് അവസരം നല്‍കരുതെന്നും മുതിര്‍ന്ന കോണ്‍ഗ്രസ് നേതാവ് സല്‍മാന്‍ ഖുര്‍ഷിദ്. ഇന്ത്യയിലെ മുസ്‌ലിം വിഭാഗക്കാര്‍ സമൂഹത്തിലെ എല്ലാ വിഭാഗങ്ങളുമായി ബന്ധപ്പെടാന്‍ ശ്രമിക്കണമെന്നും അദ്ദേഹം കൂട്ടിച്ചേര്‍ത്തു.

' ശ്രദ്ധയോടെ മാത്രമേ പ്രശ്‌നങ്ങള്‍ ഉന്നയിക്കാന്‍ പാടൂള്ളൂ. ബി.ജെ.പിക്ക് വിഭാഗീയതയ്ക്ക് അവസരം നല്‍കരുത്. നമ്മുടെ പ്രശ്‌നങ്ങള്‍ ഉന്നയിക്കുന്നതില്‍ നമ്മള്‍ ഭയപ്പെടാനും പാടില്ല. കോണ്‍ഗ്രസ് ഈ നാടിന്റെ ഐക്യത്തിന് വേണ്ടി പ്രവര്‍ത്തിച്ചവരാണ്. പക്ഷേ നിര്‍ഭാഗ്യവശാല്‍ ജനാധിപത്യം ഇപ്പോള്‍ അപകടത്തിലാണ്,' ഖുര്‍ഷിദ് പറഞ്ഞു.

മുസ്‌ലിങ്ങളല്ലാത്തവരും നമ്മുടെ പ്രശ്‌നങ്ങള്‍ ഉന്നയിക്കുന്നു എന്നത് ഭാഗ്യമാണെന്നും സല്‍മാന്‍ ഖുര്‍ഷിദ് പറഞ്ഞു. തദ്ദേശ തെരഞ്ഞെടുപ്പില്‍ തെരഞ്ഞെടുക്കപ്പെട്ട കോണ്‍ഗ്രസിന്റ മുസ്‌ലിം കൗണ്‍സിലമാര്‍ക്ക് ആശംസ അര്‍പ്പിച്ച് സംസാരിക്കുകയായിരുന്നു അദ്ദേഹം.