തിരുവനന്തപുരം: എന്‍.എസ്.എസ് ജനറല്‍ സെക്രട്ടറി സുകുമാരന്‍ നായര്‍ ഉയര്‍ത്തിയ വിമര്‍ശനത്തിന് മറുപടിയുമായി കോണ്‍ഗ്രസ് നേതാവ് രമേശ് ചെന്നിത്തല. നിയമസഭാ തെരഞ്ഞെടുപ്പില്‍ മുഖ്യമന്ത്രിയായി യു.ഡി.എഫ് ആരെയും ഉയര്‍ത്തിക്കാട്ടിയിരുന്നില്ല. എം.എല്‍.എമാര്‍ മുഖ്യമന്ത്രിയെ തെരഞ്ഞെടുക്കട്ടെ എന്നായിരുന്നു നിലപാട്. തന്നെ മുഖ്യമന്ത്രി സ്ഥാനത്തേക്ക് ഉയര്‍ത്തിക്കാട്ടിയതു കൊണ്ടാണ് തെരഞ്ഞെടുപ്പില്‍ തോറ്റതെന്ന വാദത്തില്‍ അര്‍ഥമില്ലെന്നും എന്‍.എസ്.എസ് നേതൃത്വത്തിന്റെ വിമര്‍ശനത്തിന് മറുപടിയായി ചെന്നിത്തല പറഞ്ഞു.

കഴിഞ്ഞ ദിവസം ഒരു ഇംഗ്ലീഷ് ദിനപത്രത്തിന് നല്‍കിയ അഭിമുഖത്തില്‍ സുകുമാരന്‍ നായര്‍ ശശി തരൂരിനെ പ്രശംസിക്കുകയും ചെന്നിത്തലയേയും വി.ഡി.സതീശനേയും രൂക്ഷമായി വിമര്‍ശിക്കുകയും ചെയ്തിരുന്നു. നിയമസഭാ തെരഞ്ഞെടുപ്പില്‍ ചെന്നിത്തലയെ ഉയര്‍ത്തിക്കാട്ടിയത് കൊണ്ടാണ് യു.ഡി.എഫ് തോല്‍ക്കാന്‍ കാരണമെന്നും അദ്ദേഹം പറയുകയുണ്ടായി.

'പൊതുജീവിതത്തിലും വ്യക്തിജീവിതത്തിലും മതേതര നിലപാടാണ് ഉയര്‍ത്തിപ്പിടിക്കുന്നത്. എന്നും ആ നിലപാട് തന്നെയായിരിക്കും. ഞാന്‍ എന്നും കോണ്‍ഗ്രസുകാരനാണ്. പാര്‍ട്ടിയാണ് എന്നെ വളര്‍ത്തിയതും സ്ഥാനങ്ങളിലെത്തിക്കുകയും ചെയ്തിട്ടുള്ളത്. പാര്‍ട്ടിയോടാണ് ഏറ്റവും വലിയ ഉത്തരവാദിത്തമുള്ളത്', ചെന്നിത്തല പറഞ്ഞു.