കോട്ടയം: കെ.റെയില്‍ വിരുദ്ധ സമരക്കാരും പൊലിസും ഏറ്റുമുട്ടിയ സംഭവത്തില്‍ നിരവധി പേരെ പൊലിസ് അറസ്റ്റ് ചെയ്തു. നാല് സ്ത്രീകളടക്കം 23 പേരെയാണ് പൊലിസ് അറസ്റ്റു ചെയ്തത്. ജോസഫ് എം. പുതുശ്ശേരി, മിനി കെ. ഫിലിപ്പ് എന്നിവരേയും അറസ്റ്റ് ചെയ്തിട്ടുണ്ട്. പൊലിസിനുനേരെ മണ്ണണ്ണയൊഴിച്ചതിനാണ് ചില പ്രവര്‍ത്തകരെ അറസ്റ്റ് ചെയ്തതെന്നാണ് പൊലിസ് പറയുന്നത്. പൊലിസ് സമരക്കാരായ സ്ത്രീകളെ വലിച്ചിഴതായും പരാതിയുണ്ട്.

ചങ്ങനാശേരി മാടപ്പള്ളിയില്‍ സര്‍വേ കല്ലുകള്‍ സ്ഥാപിക്കുന്നതിനെതിരായ നാട്ടുകാരുടെ പ്രതിഷേധത്തിനിടെയാണ് പൊലിസ് സമരക്കാരുമായി ഏറ്റുമുട്ടിയത്. ചങ്ങനാശേരിയിലെ 16 കുടുംബങ്ങളാണ് സമരം സംഘടിപ്പിച്ചത്. കല്ലിടാനുള്ള സംഘമെത്തിയാല്‍ തടയുമെന്നും നേരത്തേ സമരക്കാര്‍ വ്യക്തമാക്കിയിരുന്നു.
രാവിലെ ഒന്‍പത് മണി മുതല്‍ സംയുക്തസമര സമിതിയും നാട്ടുകാരും ചേര്‍ന്ന് സില്‍വര്‍ ലൈന്‍ നടപ്പാക്കാന്‍ ഉദ്ദേശിക്കുന്ന സ്ഥലത്ത് പ്രതിഷേധവുമായെത്തിയത്. പ്രതിഷേധങ്ങള്‍ക്കിടയിലും കല്ലിടല്‍ തുടരുകയാണ്.