കണ്ണൂര്‍: ഒരിടവേളയ്ക്കു ശേഷം സി.പി.എമ്മിനെ ഞെട്ടിച്ച് പി. ജയരാജനെ സ്തുതിച്ചുള്ള ബോര്‍ഡ്. മുഖ്യമന്ത്രി പിണറായി വിജയന്‍ മത്സരിക്കുന്ന ധര്‍മടം മണ്ഡലത്തിലാണ് പോരാളികള്‍ എന്ന പേരില്‍ ബോര്‍ഡ് സ്ഥാപിച്ചത്.

'ഞങ്ങടെ ഉറപ്പാണ് പി.ജെ' എന്നാണ് ബോര്‍ഡില്‍ എഴുതിയിട്ടുള്ളത്. പോരാളികള്‍ എന്ന പേരില്‍ സ്ഥാപിച്ച ബോര്‍ഡില്‍ പോരാളികള്‍ എന്നെഴുതിയതിനു താഴെയായി വാളിന്റെ ചിത്രവുമുണ്ട്. നാടെങ്ങും തെരഞ്ഞെടുപ്പ് പ്രചാരണ ബോര്‍ഡുകള്‍ ഉയര്‍ന്നുനില്‍ക്കുമ്പോള്‍ ഈ ബോര്‍ഡില്‍ തെരഞ്ഞെടുപ്പുമായി ബന്ധപ്പെട്ട ഒരു വരിപോലുമില്ല. സി.പി.എമ്മിന്റെ തെരഞ്ഞെടുപ്പ് ചിഹ്നമായ ചുറ്റിക അരിവാള്‍ നക്ഷത്രം ആലേഖനം ചെയ്തിട്ടുണ്ട്. ചുവപ്പ് പശ്ചാത്തലത്തില്‍ ജയരാജന്‍ ഇരിക്കുന്നതും പ്രസംഗിക്കുന്നതുമായ ചിത്രങ്ങളാണുള്ളത്.
ധര്‍മടം മണ്ഡലത്തിലെ സി.പി.എം ശക്തികേന്ദ്രമായ ചക്കരക്കല്‍ ആര്‍.വി മെട്ടയിലെ റോഡരികിലാണ് കൂറ്റന്‍ ബോര്‍ഡ് സ്ഥാപിച്ചത്. ഇതിനെക്കുറിച്ച് പാര്‍ട്ടിതലത്തില്‍ സി.പി.എം അന്വേഷണം തുടങ്ങി. കഴിഞ്ഞ ലോക്‌സഭാ തെരഞ്ഞെടുപ്പില്‍ ജില്ലാ സെക്രട്ടറിയായിരുന്ന ജയരാജന്‍ വടകരയില്‍ മത്സരിച്ചപ്പോള്‍ സെക്രട്ടറി സ്ഥാനം താല്‍കാലികമായി ഒഴിഞ്ഞിരുന്നു. തെരഞ്ഞെടുപ്പില്‍ പരാജയപ്പെട്ട ജയരാജനു പിന്നീട് സെക്രട്ടറി സ്ഥാനം തിരിച്ചുനല്‍കിയില്ല.

ഇതില്‍ പ്രതിഷേധിച്ച് പി.ജെ ആര്‍മി എന്ന നവമാധ്യമ കൂട്ടായ്മ പാര്‍ട്ടി നേതൃത്വത്തെ വിമര്‍ശിച്ചത് സി.പി.എമ്മിനു തലവേദന സൃഷ്ടിച്ചിരുന്നു. നിയമസഭാ തെരഞ്ഞെടുപ്പില്‍ ജയരാജനു സീറ്റ് നിഷേധിച്ചതിനെ തുടര്‍ന്നും പി.ജെ ആര്‍മി പാര്‍ട്ടി നേതൃത്വത്തെ രൂക്ഷമായി വിമര്‍ശിച്ചിരുന്നു.

പാര്‍ട്ടി നേതൃത്വത്തെ വിമര്‍ശിച്ച പി.ജെ ആര്‍മിക്കെതിരേ ഒടുവില്‍ ജയരാജന്‍ തന്നെ രംഗത്തെത്തുകയും പി.ജെ ആര്‍മിയുമായി തനിക്കോ പാര്‍ട്ടിക്കോ ഒരു ബന്ധവുമില്ലെന്നു വ്യക്തമാക്കുകയും ചെയ്തിരുന്നു.