തിരുവനന്തപുരം: യു.ഡി.എഫ് സര്‍ക്കാര്‍ നടപ്പാക്കിയ പങ്കാളിത്ത പെന്‍ഷന്‍ സംസ്ഥാന ജീവനക്കാര്‍ക്ക് ലഭിക്കുമെന്ന് ഒരു ഗ്യാരന്റിയുമില്ലെന്ന് മന്ത്രി ടി.പി.രാമകൃഷ്ണന്‍. 2004മുതല്‍ കേന്ദ്രം ആവശ്യപ്പെട്ടിട്ടും സംസ്ഥാനം പങ്കാളിത്തപെന്‍ഷന്‍ നടപ്പാക്കിയിരുന്നില്ല. ജീവനക്കാരുടെ എതിര്‍പ്പ് തള്ളിക്കളഞ്ഞാണ് പങ്കാളിത്ത പെന്‍ഷന്‍ നടപ്പാക്കിയത്. പങ്കാളിത്ത പെന്‍ഷനോട് ആര്‍ക്കും യോജിക്കാന്‍ കഴിഞ്ഞില്ലെങ്കിലും രാഷ്ട്രീയകാരണങ്ങളാല്‍ ചില സംഘടനകള്‍ അനുകൂലിക്കുകയായിരുന്നു. ജീവനക്കാരുടെ പൊതുതാല്‍പര്യത്തിന് പങ്കാളിത്തപെന്‍ഷന്‍ സഹായകമല്ലെന്നാണ് സര്‍ക്കാര്‍ നിലപാടെന്നും ലേബര്‍ ഓഫളസേഴ്‌സ് ഫോറം സംഘടിപ്പിച്ച ലേബര്‍ ഓഫിസര്‍മാരുടെ യാത്രയയപ്പ് ചടങ്ങില്‍ മന്ത്രി പറഞ്ഞു.

ശമ്പളവും പെന്‍ഷനും നല്‍കുന്നത് ജനങ്ങളുടെ പണം ഉപയോഗിച്ചാണെന്ന് ജീവനക്കാര്‍ക്ക് ബോധ്യംവേണം. ജനങ്ങളോടുള്ള ഉത്തരവാദിത്വം ജീവനക്കാരുടെ പ്രവര്‍ത്തനത്തിലും മനസിലുമുണ്ടാകണം. തൊഴിലാളികളോട് പക്ഷപാതിത്വമുള്ള സര്‍ക്കാരാണെന്ന് മനസിലാക്കിവേണം തൊഴില്‍ പ്രശ്‌നങ്ങളില്‍ ഇടപെടാന്‍. ആനുകൂല്യങ്ങള്‍ വെട്ടിക്കുറച്ചും തൊഴില്‍ സംരക്ഷണം ഇല്ലാതാക്കിയുമുള്ള കേന്ദ്രനയങ്ങള്‍ നടപ്പാക്കില്ലെന്നും മന്ത്രി പറഞ്ഞു.

ജില്ലാ ലേബര്‍ ഓഫിസര്‍മാരായി വിരമിച്ച എം.സൈനുലാബ്ദ്ദീന്‍, കെ.പി രാധാകൃഷ്ണന്‍, ബോണിവര്‍ഗീസ്, എന്‍.സത്യമൂര്‍ത്തി, ടി.നസീര്‍ഖാന്‍, എം.എസ് നാരായണന്‍ നമ്പൂതിരി, സി.ജി മേരി, പി.കെ രമേശന്‍, ഡെപ്യൂട്ടി ലേബര്‍ ഓഫിസര്‍മാരായ പി.ചന്ദ്രബോസ്, എസ്.രാധാമണി, പി.രാജന്‍, സുധാകരന്‍പിള്ള, കോശിപണിക്കര്‍ എന്നിവര്‍ക്ക് മന്ത്രി ഉപഹാരം നല്‍കി. ജീവനക്കാരുടെ മക്കളില്‍ പരീക്ഷകളില്‍ ഉന്നതവിജയം നേടിയവര്‍ക്കുള്ള അവാര്‍ഡുകളും മന്ത്രി വിതരണം ചെയ്തു.