ഗുവാഹത്തി: ശ്രീലങ്കക്കെതിരായി ഏകദിനത്തില്‍ ഇന്ത്യയ്ക്ക് 67 റണ്‍സിന്റെ ജയം. ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഇന്ത്യ നിശ്ചിത 50 ഓവറില്‍ ഏഴു വിക്കറ്റ് നഷ്ടത്തില്‍ നേടിയത് 373 റണ്‍സ്. ശ്രീലങ്കയുടെ മറുപടി 50 ഓവറില്‍ എട്ടു വിക്കറ്റ് നഷ്ടത്തില്‍ 306 റണ്‍സില്‍ അവസാനിച്ചു.

ഏകദിനത്തിലെ രണ്ടാം സെഞ്ചുറി നേടിയ ഷനക 108 റണ്‍സുമായി പുറത്താകാതെ നിന്നു. ഏകദിനത്തില്‍ ഷനകയുടെ ഉയര്‍ന്ന വ്യക്തിഗത സ്‌കോറാണിത്. ഇതോടെ മൂന്നു മത്സരങ്ങളടങ്ങിയ പരമ്പരയില്‍ ഇന്ത്യ 1-0ന് മുന്നിലെത്തി. പരമ്പരയിലെ രണ്ടാം മത്സരം വ്യാഴാഴ്ച കൊല്‍ക്കത്തയിലെ ഈഡന്‍ ഗാര്‍ഡന്‍സില്‍ നടക്കും.ഏകദിനത്തിലെ രണ്ടാം സെഞ്ചുറി കുറിച്ച ഷനകയാണ് ശ്രീലങ്കയുടെ ടോപ് സ്‌കോറര്‍. 88 പന്തുകള്‍ നേരിട്ട ഷനക, 12 ഫോറും മൂന്നു സിക്‌സും സഹിതമാണ് സെഞ്ചുറിയിലേക്കെത്തിയത്.

വിരാട് കോലിയുടെ സെഞ്ചുറിക്കരുത്തിലാണ് ലങ്കയ്‌ക്കെതിരെ ഇന്ത്യ വമ്പന്‍ വിജയലക്ഷ്യമുയര്‍ത്തിയത്. 87 പന്തില്‍ 113 റണ്‍സുമായി കോലി മുന്നില്‍ നിന്ന് നയിച്ചപ്പോള്‍ ഏഴു വിക്കറ്റ് നഷ്ടത്തില്‍ ഇന്ത്യ നേടിയത് 373 റണ്‍സാണ്.