തിരുവനന്തപുരം: സ്വാശ്രയ കോളജുകളിലെ മെഡിക്കല്‍, ബി.ഡി.എസ് കോഴ്‌സുകളിലെ മാനേജ്‌മെന്റ് സീറ്റുകളിലേക്കുള്ള പ്രവേശനം സംബന്ധിച്ച് സ്വാശ്രയ മാനേജ്‌മെന്റ് അസോസിയേഷന്‍ പ്രതിനിധികളുമായി സര്‍ക്കാര്‍ നടത്തിയ ചര്‍ച്ച പരാജയപ്പെട്ടു.

മാനേജ്‌മെന്റ് സീറ്റില്‍ ഉള്‍പ്പെടെ മുഴുവന്‍ സീറ്റിലേയ്ക്കും സംസ്ഥാന സര്‍ക്കാര്‍ തന്നെ അലോട്ട്‌മെന്റ് നടത്തുമെന്ന് ആരോഗ്യമന്ത്രി കെ.കെ ശൈലജ സ്വാശ്രയ മാനേജ്‌മെന്റ് പ്രതിനിധികളെ അറിയിച്ചതോടെയാണ് ഇന്നലെ നടത്തിയ രണ്ടാംഘട്ട ചര്‍ച്ച പരാജയപ്പെട്ടത്. ഇത് അംഗീകരിക്കാന്‍ കഴിയില്ലന്ന് മെഡിക്കല്‍ മാനേജ്‌മെന്റ് അറിയിച്ചതോടെ സ്വാശ്രയ മെഡിക്കല്‍ പ്രവേശനം കൂടുതല്‍ പ്രതിസന്ധിയിലുമായി.

ഇത്തരമൊരു നിലപാടാണ് സര്‍ക്കാരിനെങ്കില്‍ സര്‍ക്കാരുമായി ഈ വര്‍ഷത്തെ കരാര്‍ ഒപ്പുവയ്ക്കില്ലെന്നു വ്യക്തമാക്കി മാനേജ്‌മെന്റ് പ്രതിനിധികള്‍ ചര്‍ച്ചയില്‍ നിന്നു ഇറങ്ങിപ്പോയി.

ഇനിയുള്ള ചര്‍ച്ച മുഖ്യമന്ത്രിയുമായി ആണെന്നും മുഖ്യമന്ത്രിക്കും ഈ നിലപാടാണെങ്കില്‍ കോടതിയെ സമീപിക്കുമെന്നും മെഡിക്കല്‍ മാനേജ്‌മെന്റ് പ്രതിനിധികള്‍ പറഞ്ഞു.ആരോഗ്യമന്ത്രിയുമായുള്ള ചര്‍ച്ച പരാജയപ്പെട്ടതോടെ അസോസിയേഷന്‍ ഭാരവാഹികള്‍ മുഖ്യമന്ത്രി പിണറായി വിജയനെ കാണാനെത്തെിയെങ്കിലും അദ്ദേഹം ഓഫിസില്‍ ഉണ്ടായിരുന്നില്ല.

ചര്‍ച്ച പരാജയപ്പെട്ടതിനെ തുടര്‍ന്നു അസോസിയേഷന്‍ ഭാരവാഹികള്‍ യോഗം ചേരുകയും സ്വന്തം നിലക്ക് പ്രവേശന നടപടികളുമായി മുന്നോട്ടുപോകാന്‍ തീരുമാനിക്കുകയും ചെയ്തു.

മുഴുവന്‍ സീറ്റുകളിലേക്കും കോളജുകള്‍ തന്നെ നീറ്റ് പട്ടികയില്‍ നിന്നു പ്രവേശനം നടത്തുമെന്നു അസോസിയേഷന്‍ സെക്രട്ടറി വി. അനില്‍ അറിയിച്ചു. മെറിറ്റ്, മാനേജ്‌മെന്റ് എന്‍.ആര്‍.ഐ ഉള്‍പ്പെടെ മുഴുവന്‍ സീറ്റുകളിലും സര്‍ക്കാര്‍ പ്രവേശനം നടത്തിയാല്‍ കോളജുകള്‍ പ്രവര്‍ത്തിപ്പിച്ച് മുന്നോട്ടുകൊണ്ടുപോകാന്‍ സാധിക്കില്ലെന്ന നിലപാടാണ് മാനേജ്‌മെന്റിനുള്ളത്.

തര്‍ക്കം പരിഹരിക്കാന്‍ കഴിയാതെ പോയതോടെ ഫീസ് ഘടന സംബന്ധിച്ചുള്ള ചര്‍ച്ചയും നടന്നില്ല. തിങ്കളാഴ്ച സ്വന്തം നിലക്കുള്ള പ്രവേശന നടപടികളുമായി മുന്നോട്ടുപോകാനാണ് അസോസിയേഷന്റെ നിലപാട്.