തിരുവനന്തപുരം
ഇത്തവണ മുതൽ എസ്.എസ്.എൽ.സി, പ്ലസ്‌ ടു വാർഷിക പരീക്ഷയ്‌ക്ക്‌ ശേഷം ചോദ്യപേപ്പർ വിലയിരുത്താൻ കുട്ടികൾക്ക്‌ വിദ്യാഭ്യാസ വകുപ്പ്‌ അവസരമൊരുക്കുമെന്ന് മന്ത്രി വി ശിവൻകുട്ടി പറഞ്ഞു. പരീക്ഷയ്ക്ക്‌ ശേഷം കുട്ടികൾക്ക്‌ ചോദ്യപേപ്പറിനെ വിലയിരുത്താൻ പ്രത്യേക ഷീറ്റ്‌ നൽകും. കുട്ടികൾ ഇതിന്‌ മറുപടി എഴുതി നൽകണം. ഇവ പിന്നീട്‌ എസ്‌.സി.ഇ.ആർ.ടി വിലയിരുത്തും.
വിദഗ്‌ധരുടെ അഭിപ്രായം ശേഖരിച്ച ശേഷം വിദ്യാർഥികളുടെ നിർദേശങ്ങൾകൂടി പരിഗണിച്ചാകും അടുത്ത വർഷത്തെ വാർഷിക പരീക്ഷയ്‌ക്കുള്ള ചോദ്യപേപ്പർ തയ്യാറാക്കുകയെന്ന് മന്ത്രി പറഞ്ഞു.
പൊതുപരീക്ഷയുടെ ചോദ്യപേപ്പറുകൾ കുട്ടികൾ വിലയിരുത്തുന്നത്‌ വേറിട്ട കേരള മാതൃകയാണെന്നും വിദ്യാഭ്യാസത്തിലെ അവിഭാജ്യഘടകമായ മൂല്യനിർണയ രീതികൾ കാലാനുസൃതമായി പരിഷ്കരിക്കേണ്ടതുണ്ടെന്നും മന്ത്രി പറഞ്ഞു.